Qazaqstan Orta dálizde mańyzdy ról atqarady - Cargolux basshysy
ASTANA. KAZINFORM – Qazaqstan Orta dálizdi damytýda mańyzdy ról atqarady jáne halyqaralyq áýe júkteri úshin tranzıttik qana emes, sonymen qatar kommertsııalyq alańǵa aınalýy múmkin.
Bul týraly Lıýksembýrgtegi jetekshi eýropalyq júk tasymaldaýshy Cargolux Airlines International S.A. kompanııasynyń prezıdenti Astana halyqaralyq áýejaıymen yntymaqtastyqty jandandyrý aıasynda málimdedi, dep habarlaıdy Kazinform agenttiginiń EO-daǵy menshikti tilshisi.
2026 jyldyń 1 maýsymynan bastap Cargolux Qazaqstan naryǵyna qaıta oralyp, aptasyna 14 júk reısine deıin oryndaýdy josparlap otyr. Bul Qazaqstannyń kólik baılanysyn, halyqaralyq saýdany odan ári damytýǵa jáne eldiń keń aýqymdy logıstıka jáne avıatsııa ambıtsııalaryn júzege asyrýǵa yqpal etedi.
Kompanııa Astana halyqaralyq áýejaıymen tolyq jumysty qaıta bastaýdy, sondaı-aq Qazaqstan naryǵyna qaıta oralý jáne otandyq seriktestermen yntymaqtastyqty jańartý úshin Taıaý Shyǵysty aınalyp ótetin jahandyq tranzıttik júk aǵyndaryn qaıta bólýdi ýaqtyly múmkindik retinde qarastyryp otyr.
Cargolux kompanııasynyń Qazaqstanda uzaq tarıhy bar ekenin atap ótken jón. Kompanııa Almaty áýejaıynda 2007 jyly jumys isteı bastady, qalany tehnıkalyq janarmaı quıý pýnkti retinde paıdalanyp, Qazaqstandy perspektıvaly tranzıttik hab retinde qarastyrdy.
Kommertsııalyq sharttardyń ózgerýine jáne avıatsııalyq otyn baǵasyna qatysty máselelerge qaramastan kompanııa 2022 jyldyń qańtaryna deıin Qazaqstan naryǵynda óz ornyn saqtap, aptasyna orta eseppen shamamen eki reıs oryndady.
2023 jyly áýe kompanııasy Astana áýejaıy arqyly da jumys istep, Eýropa men Shyǵys Azııa arasyndaǵy baǵyttar boıynsha kommertsııalyq jáne tehnıkalyq reısterdi oryndady. Alaıda kommertsııalyq sharttardy, eń aldymen avıatsııalyq otyn shyǵyndaryn jáne qyzmet jaǵdaılaryn uzaq merzimdi boljamdylyǵyna baılanysty bul operatsııalar 2023 jyldyń tamyz aıynda toqtatyldy.
Cargolux-tyń Qazaqstanǵa oralýy Qazaqstan men Lıýksembýrg arasyndaǵy kólik, logıstıka jáne ekonomıkalyq yntymaqtastyqty nyǵaıtýdaǵy praktıkalyq qadam bolýy múmkin, sonymen qatar Orta dálizdi damytýǵa jáne Qazaqstannyń tranzıttik áleýetin júzege asyrýǵa qosymsha serpin beredi.
Cargolux Airlines International S.A. prezıdenti jáne bas dırektory Rıchard Forson Kazinform agenttigine bergen suhbatynda kompanııa bizdiń elimizben yntymaqtastyqtyń qaıta jandanýyn quptaıtynyn atap ótti.
- Astanany tańdaýdyń negizgi sebepteriniń biri – bizdiń jelimizdiń, ásirese Eýropa-Azııa jáne Azııa-Eýropa baǵyttarynda turaqtylyǵyn arttyrý. Bul geosaıası shıelenis sala úshin qıyndyqtar týdyryp jatqan qazirgi belgisizdik kezeńinde biz úshin mańyzdy. Sondyqtan biz Astanaǵa oralatynymyzǵa óte qýanyshtymyz, - dedi ol.
R.Forson sondaı-aq Orta dálizdiń strategııalyq mańyzdylyǵyn jáne Qytaı men Eýropany baılanystyratyn negizgi kólik jáne logıstıkalyq hab retindegi Qazaqstan róliniń artýyn atap ótti.
- Qazaqstan Orta dálizde avtomobıl joldary, temirjol jáne áýe qatynasy turǵysynan mańyzdy ról atqarady. Qazirgi kezeńde ol ásirese Azııadan Eýropaǵa júkpen oralatyn ushaqtar úshin tehnıkalyq aıaldama qyzmetin atqarady. Bolashaqta, Qazaqstan ekonomıkasy ósken saıyn, Astanada kommertsııalyq aıaldamalar jasaı bastaımyz dep úmittenemiz, - dep atap ótti ol.
Kompanııa basshysy sonymen qatar Qazaqstan basty tranzıttik habtardyń biri retindegi mártebesin saqtaý úshin ınfraqurylymǵa aıtarlyqtaı ınvestıtsııalar salyp jatqanyn qosty.
Eske sala ketsek, Qazaqstan men Lıýksembýrg arasyndaǵy saýda aınalymy 2025 jyly 19,7 mln AQSh dollaryn (+1,3%) qurady.
Qazaqstanda Lıýksembýrg kapıtaly bar 192 kompanııa tirkelgen. Lıýksembýrgte tirkelgen jáne Qazaqstanda jumys isteıtin eń iri kompanııa - Eurasian Resources Group.
Cargolux Airlines International S.A. 1970 jyly qurylǵan jáne Lıýksembýrgte ornalasqan. Kompanııa halyqaralyq áýe júk tasymalyna mamandanǵan jáne Eýropa, Azııa, Soltústik jáne Ońtústik Amerıka, Afrıka jáne Taıaý Shyǵysta 90-nan astam baǵytqa ushady. Cargolux floty negizinen Boeing 747 Freighter júk ushaqtarynan turady. Bul ushaqtar bir reıste 130 tonnadan astam júk tasymaldaı alady.
Osyǵan deıin Petropavl áýejaıy janynan jańa logıstıkalyq hab ashylatynyn jazdyq.
Sondaı-aq Qazaqstanda Kenııanyń saýda haby ashylatyny habarlandy.
