Qazaqstan Orta Azııadaǵy ıntegratsııany Jibek joly tóńireginde toptastyrýdy usynady
ASTANA. QazAqparat - Qazaqstan Orta Azııadaǵy ıntegratsııany Jibek joly tóńireginde toptastyrýdy usynady. Búgin Astanadaǵy «Qazaqstan» kınokontsert zalynda ótken Azııa damý banki Basqarýshylar keńesiniń 47-shi jyl saıynǵy otyrysynda Elbasy Nursultan Nazarbaev osylaı málim etti.
«Bizdiń barlyǵymyzda Azııa elderi arasyndaǵy, sonymen birge basqa ıntegratsııalyq birlesikter arasyndaǵy yntymaqtastyq shekarasyn keńeıtý qajet. Ashyqtyq, teńdik, ózara tıimdilik ustanymdaryna negizdelgen óńirlik ıntegratsııa tabysty damý úshin senimdi tetik bolyp tabylady», - dedi N.Nazarbaev.
Memleket basshysynyń paıymynsha, Azııa-Tynyq muhıty óńirindegi ishki óńirlik ıntegratsııanyń kúsheıýi, Ońtústik-Shyǵys Azııadaǵy ekonomıkalyq ıntegratsııa salasynyń qarqyndy keńeıýi baıqalyp otyr.
«Bizdiń ortaq ıntegratsııalyq protsesimizdi Uly Jibek jolyn jańǵyrtý tóńireginde toptastyrýǵa bolady. Qazirgi Jibek joly aýmaǵynda shektesetin memleketterdiń naryǵy óziniń aýqymy men áleýeti boıynsha teńdessiz bolyp sanalady. Munda 3 mıllıardtan astam adam turady», - dedi N.Nazarbaev
Elbasy Qazaqstannyń Ortaazııalyq óńirlik ekonomıkalyq yntymaqtastyq baǵdarlamasy aıasynda Aýǵanstan, Ázerbaıjan, Qytaı, Mońǵolııa, Pákistan, Tájikstan, Túrkimenstan, Ózbekstan syndy elderimen jan-jaqty yntymaqtastyqty jolǵa qoıyp otyrǵandyǵyn basa aıtty.
«Sonyń arqasynda Ortaazııalyq óńirde ortaq ekonomıkalyq jáne kóliktik ınfraqurylym qalyptasady. Qazaqstan bizdiń óńirimizdegi mundaı qarym-qatynastardy damytýǵa túbegeıli qyzyǵýshylyq tanytady»,- dedi Elbasy.
