Qazaqstan Orta Azııa elderi arasynda melanoma dertine shaldyǵýshylardyń sany boıynsha birinshi orynda tur - onkolog mamandar
ASTANA. QazAqparat - Qazaqstan Orta Azııa elderi arasynda melanoma dertine shaldyǵýshylardyń sany boıynsha birinshi orynda tur. Bul týraly búgin Melanomamen kúres kúnine oraılastyrylyp ótkizilgen onkologtar konferentsııasy barysynda Astana qalasy Onkologııalyq ortalyǵynyń dırektory Muhtar Tóleýtaev aıtty.
Onyń málimeti boıynsha, 2013 jyly Qazaqstanda melanoma dertiniń aıtarlyqtaı joǵary kórsetkishi Almaty, Shyǵys Qazaqstan, Soltústik Qazaqstan, Qaraǵandy jáne Pavlodar oblystarynda tirkelgen. Jyl saıyn Qazaqstanda melanomadan 150 adam kóz jumady. 2012 jyly 286 emdelýshige melanoma dıagnozy qoıylsa, 2013 jyly bul dertke shaldyqqandar sany 326-ǵa deıin artqan. Al 2014 jyly emdelýshiler sany 340 adamdy qurady.
«Aýrýdy erte dıagnostıkalaýdyń jáne emdeýdiń túrli ádisteri jyl sanap kóbeıip, jetildirilip keledi. Degenmen turǵyndardy aqparattandyrý jáne saqtandyrý deńgeıi tómen bolǵandyqtan bul dertke shaldyǵýshylardyń sany da artyp otyr. Teride paıda bolatyn qaterli óskindermen kúresý tek qana medıtsına qarastyratyn másele emes, ol aýqymdy yqpal etýdi talap etetin túıtkildi másele. Sondyqtan da memlekettik ınstıtýt, kásibı táýelsiz assotsıatsııalar jáne bıznes sııaqty úsh jaqtyń birlesip kúsh jumyldyrýy - arnaıy mamandar daıyndap, turǵyndar arasynda onkologııalyq aýrýlardyń aldyn alý týraly aqparat taratýda taptyrmaıtyn sheshim bolmaq», - deıdi M. Tóleýtaev.
Mamandardyń aıtýynsha, melanoma dertine shaldyǵý elimizdiń soltústik óńirlerinde turatyn adamdardyń jaz aılarynda ystyq jaqqa baryp, shamadan tys kúnge kúıýinen de bolady. Osyǵan baılanysty onkolog dárigerler kúnge kúıýdiń de mólshermen bolǵany durys degen keńes beredi. Sonymen qatar, terini solıarııde shamadan tys kúıdirý de melanomaǵa shaldyǵý qaýpin joǵarylatady.
Aıta keteıik, alǵash ret melanomany 1806 jyly belgili frantsýz ǵalymy Laennek ashqan. Melanoma kóbinese teride, keıde kózdiń tor qabyǵynda, shyryshty qabatynda paıda bolady. Atalǵan dert kóbine 40-50 jas aralyǵynda jıirek kezdesedi jáne alǵashynda qara meń sııaqty bolady. Eger meńniń nemese pıgmenttik daqtardyń sany artsa, ne bolmasa pishinin ózgertip, úlkeıse, dárigerge qaralý qajet.
