Qazaqstan ornyqty ekonomıkaǵa tereń ári kezeńimen kóshý jolyna tústi - Sadyqov Bekjan
NUR-SULTAN. QazAqparat - Úshinshiden, Qazaqstanda aldaǵy 5 jylda 2 mıllıardqa deıin aǵash otyrǵyzylady. Mundaı shara aýany tazartýǵa jáne sáıkesinshe atmosferanyń lastanýyn azaıtýǵa kómektesedi. Bul týraly QR Prezıdenti janyndaǵy QSZI halyqaralyq zertteýler bóliminiń aǵa ǵylymı qyzmetkeri Sadyqov Bekjan Erlanuly aıtty.
Sarapshynyń aıtýynsha, Memleket basshysy «Óndirýshi salalardaǵy máseleler jónindegi jahandyq dóńgelek ústel» otyrysynda sóılegen sózinde Qazaqstannyń ornyqty damý salasyndaǵy maqsattardy júzege asyrýǵa jáne klımattyń ózgerýi týraly Parıj kelisimin iske asyrýǵa beıildiligin atap ótti.
«Bizdiń memleket klımattyq saıasat máselelerin aınalyp óte almaıdy, óıtkeni jer qoınaýyn jáne jalpy tabıǵı resýrstardy ırratsıonaldy basqarýdyń saldary damýshy elder tap bolyp otyrǵan mańyzdy problemalardyń biri bolyp tabylady. Kóbinese ekojúıeler men bıosferanyń nasharlaýynyń negizgi faktory dep atalatyn óndirýshi ónerkásiptiń tabıǵı resýrstardy paıdalanýy memleketterdiń, onyń ishinde Qazaqstannyń áleýmettik-ekonomıkalyq júıeleriniń odan ári turaqty jumys isteýi úshin orasan zor táýekelder týdyrady.
Osyǵan baılanysty Q.K. Toqaev memlekettik saıasattyń balamasyz basymdyǵy retinde ulttyq ekonomıkany dekarbonızatsııalaý jáne ony «kógaldandyrý» boıynsha naqty sharalardy atap ótti. Birinshiden, 2060 jylǵa qaraı kómirtegi beıtaraptyǵyna qol jetkizý maqsatynda Qazaqstan Prezıdenti «Tómen kómirtekti damýynyń 2050 jylǵa deıingi kezeńge arnalǵan tujyrymdamasyn» engizý jónindegi josparlardy belgiledi. Bul tujyrymdama atmosferaǵa parnıktik gazdar shyǵaryndylaryn qysqartýdy jáne ekonomıkanyń barlyq salalarynda tıisti qaıta qurýlar negizinde jańartylatyn energııa kózderin paıdalanatyn jobalardy iske asyrýdy qamtamasyz etýge múmkindik beredi. Ekinshiden, Memleket basshysy energetıkalyq teńgerim qurylymyn kómirge táýeldilikti qysqartý jaǵyna ózgertý úshin «Elektr energetıkasyn damytý jónindegi ulttyq jobany» ázirleý josparyn aıtty. «Klımattyń ózgerýi jónindegi úkimetaralyq sarapshylar toby» (IPCC) 2040 jylǵa qaraı kómirdi dúnıejúzilik paıdalanýdy 80%-ǵa qysqartýdy usynady jáne ulttyq jobanyń mindetteri energııanyń «zııandy» emes kózderine ótý úshin tıimdi ınfraqurylym qurýǵa kómektesetinin atap ótken jón. Úshinshiden, Qazaqstanda aldaǵy 5 jylda 2 mıllıardqa deıin aǵash otyrǵyzylady. Mundaı shara aýany tazartýǵa jáne sáıkesinshe atmosferanyń lastanýyn azaıtýǵa kómektesedi»,- dedi ol.
Budan basqa, aǵa ǵylymı qyzmetker Q.K. Toqaev ornyqty damý maqsattaryna qol jetkizý úshin búkil álemdik qoǵamdastyqtyń úılestirilgen kúsh-jigeri máselelerin qozǵap, memlekettik jáne jeke qarjy resýrstaryn jumyldyrý - jasyl jahandyq ekonomıkaǵa jedel jáne tıimdi kóshýdiń mańyzdy faktory ekenin aıtqanyn atap ótti.
«Jalpy, Qazaqstan CO2-ny atmosferaǵa azaıtýǵa baǵyttalǵan uzaq merzimdi júıelik aýysýlarǵa bastamashy bolǵanyn jáne azamattar úshin qaýipsiz ári jarqyn bolashaqty qamtamasyz etý úshin anaǵurlym turaqty ekonomıkaǵa tereń ári kezeńimen júıeli túrde kóshýdi bastaǵanyn atap ótken jón»,- dep túıdi sózin Sadyqov Bekjan.
Aıta keteıik, Qazaqstan Prezıdenti Óndirýshi salalardaǵy máseleler jónindegi jahandyq dóńgelek ústel otyrysynda beıne úndeý jasaǵan bolatyn. Qazaqstan 2060 jylǵa qaraı kómirteginen taza el bolýǵa qol jetkizýge nıetti ekenin aıtqan edi.
