Qazaqstan ornyqty damý jónindegi jahandyq reıtıngte úsh satyǵa kóterildi
ASTANA. KAZINFORM — Qazaqstan ornyqty damý jónindegi jahandyq reıtıngtegi pozıtsııasyn ilgeriletti.
— Qazaqstan ornyqty damý salasyndaǵy jahandyq kún tártibindegi óz ustanymyn nyǵaıtýdy jalǵastyryp otyr. 2026 jylǵy Ornyqty damý jónindegi eseptiń (Sustainable Development Report) qorytyndysyna sáıkes, elimiz Ornyqty damý maqsattaryna qol jetkizý ındeksi boıynsha 169 memlekettiń ishinde 67-orynǵa ıe bolyp, ótken jylmen salystyrǵanda 3 satyǵa joǵarylady. Eske salsaq, 2025 jyly Qazaqstan 167 eldiń ishinde 70-orynda bolǵan.
2026 jylǵy reıtıng qorytyndysy boıynsha Qazaqstan G20 elderiniń birqataryn, onyń ishinde Indonezııa, Meksıka, Túrkııa, Úndistan jáne Saýd Arabııasyn basyp ozdy, — delingen Ekonomıka mınıstrliginiń habarlamasynda.
Mysaly, eń mańyzdy jetistikterdiń biri retinde ODM 6 «Taza sý jáne sanıtarııa» baǵyty boıynsha qol jetkizilgen ilgerileýdi atap ótýge bolady. Halyqtyń bazalyq aýyz sýmen jabdyqtaý qyzmetterine qoljetimdiligi 95,4%-dan 97,8%-ǵa deıin artty, tuşy sý alý kólemi azaıdy, sondaı-aq óndirisi sý tapshylyǵy baıqalatyn sý resýrstaryn paıdalanýdy talap etetin ımporttalatyn taýarlardyń quramyndaǵy sý kólemi qysqardy.
Sonymen qatar, áleýmettik salany damytý, ınfraqurylymdy jańǵyrtý, ınnovatsııalyq qyzmetti yntalandyrý jáne halyqtyń ál-aýqatyn arttyrý sııaqty ODM-nyń negizgi baǵyttary boıynsha turaqty ilgerileý baıqalady. Budan bólek, Qazaqstan ODM-dy memlekettik saıasatqa yqpaldastyrý jónindegi SDSN saraptamalyq saýalnamasyna engizilgen Ortalyq Azııadaǵy jalǵyz memleket atandy.
Jahandyq reıtıngtegi pozıtsııanyń jaqsarýy júrgizilip jatqan memlekettik saıasattyń tıimdiligin jáne ornyqty, ınklıýzıvti ári uzaq merzimdi damý qaǵıdattaryna beıildilikti rastaıdy.
Aıta ketelik Fitch Qazaqstannyń kredıttik reıtıngin «BBB» deńgeıinde rastaǵan edi.
