Qazaqstan Ornyqty damý maqsattaryna beıildiligin rastady
ASTANA. KAZINFORM — Syrtqy ister mınıstrliginde QR Úkimeti men Birikken Ulttar Uıymy arasyndaǵy 2026-2030 jyldarǵa arnalǵan Ornyqty damý salasyndaǵy yntymaqtastyq negizdemelik baǵdarlamasynyń Basqarýshy komıtetiniń otyrysy ótti, dep habarlaıdy vedomstvonyń baspasóz qyzmeti.
Otyrysqa memlekettik organdardyń ókilderi, BUU agenttikteri, baǵdarlamalary men qorlarynyń basshylary, sondaı-aq úkimettik emes uıymdardyń jetekshileri qatysty.
Óz sózinde Ulttyq ekonomıka vıtse-mınıstri Asan Darbaev Ornyqty damý maqsattaryna (ODM) qol jetkizý memlekettik josparlaý júıesine tolyq engizilgenin jáne Úkimettiń turaqty vedomstvoaralyq baqylaýynda ekenin atap ótti. Onyń aıtýynsha, elde ODM boıynsha shamamen 200 ulttyq ındıkator qoldanylady, bul progresti júıeli túrde baǵalaýǵa múmkindik beredi. Sonymen qatar, ol 2025 jyldyń qorytyndysy boıynsha jalpy ishki ónimniń 6,5%-ǵa óskenin aıtyp, áleýmettik-ekonomıkalyq damýdyń turaqty dınamıkasyn atap ótti.
Qazaqstandaǵy BUU Turaqty úılestirýshisi Sarango Radnaragcha eldiń aıtarlyqtaı progreske qol jetkizgenin málimdedi.
— ODM nysanaly kórsetkishteriniń shamamen 40%-y oryndalǵan nemese turaqty iske asyrylý jolynda, bul álemdik ortasha kórsetkishten 18%-dan edáýir joǵary, — dedi Sarango Radnaragcha.
Ol sondaı-aq jańa Konstıtýtsııa jobasy boıynsha jalǵasyp jatqan qoǵamdyq dıalogty qosa alǵanda, reformalardyń dáıekti júrgizilip jatqanyn atap ótti.
Óz kezeginde, QR SІM Kópjaqty yntymaqtastyq departamentiniń dırektory Dıdar Temenov Memleket basshysy BUU Qazaqstan úshin halyqaralyq tártiptiń balamasyz ári basty tiregi bolyp qala beretinin birneshe ret atap ótkenin aıtty. Osy turǵyda 2026-2030 jyldarǵa arnalǵan Ornyqty damý salasyndaǵy yntymaqtastyqtyń negizdemelik baǵdarlamasy birlesken jumystyń strategııalyq baǵdaryn aıqyndaıtyny jáne BUU qoldaýynyń ulttyq damý basymdyqtaryna tolyq sáıkes keletinin jetkizdi.
Sondaı-aq, Temenov Qazaqstannyń bastamasymen Almaty qalasynda Ortalyq Azııa men Aýǵanstanǵa arnalǵan Ornyqty damý maqsattary jónindegi BUU Óńirlik ortalyǵy qurylǵanyn eske saldy. Bul qadam damý baǵytyna negizdelgen óńirlik kópjaqty yntymaqtastyqty nyǵaıtýǵa mańyzdy úles boldy.
Otyrystyń qorytyndysy boıynsha Basqarýshy komıtet 2025 jylǵy jumystyń nátıjelerin maquldap, aǵymdaǵy jylǵa arnalǵan basymdyqtardy bekitti. Sonymen qatar, Qazaqstan men BUU arasyndaǵy Ornyqty damý maqsattaryna jetý úshin strategııalyq áriptestikti odan ári nyǵaıtýǵa beıildiligin rastady.
Budan buryn Djeren Gıýres BUU men Qazaqstan ózara yntymaqtastyqtyń ekinshi kezeńine ótkenin málimdegen bolatyn.