Qazaqstan ornyqty damý maqsattary boıynsha úshinshi ulttyq sholýyn tanystyrdy
ASTANA. KAZINFORM — Qazaqstan BUU shtab-páterinde Ornyqty damý jónindegi joǵary deńgeıdegi saıası forýmǵa qatysyp, Ornyqty damý maqsattaryn iske asyrý boıynsha úshinshi erikti ulttyq sholýyn tanystyrdy. Sholýdy QR Ekonomıkalyq zertteýler ınstıtýty Ulttyq ekonomıka mınıstrliginiń úılestirýimen jáne Qazaqstandaǵy BUU Damý baǵdarlamasynyń kómegimen daıyndaǵan.
BUU-nyń halyqaralyq alańynda sholýdy tanystyrý – Qazaqstannyń ornyqty, ınklıýzıvti jáne ádil damý qaǵıdattaryna beıildigin rastaýdaǵy mańyzdy qadam. Sholý qol jetkizilgen jetistikti kórsetedi, syn-qaterlerdi anyqtaıdy jáne jahandyq kún tártibindegi memlekettik saıasattyń negizgi basymdyqtaryn aıqyndaıdy.
Sholý elimizdiń barlyq óńirlerindegi memlekettik organdardyń, azamattyq qoǵamnyń, ǵylymı qoǵamdastyqtyń, bıznestiń jáne jastardyń ókilderin qosa alǵanda, 2000-ǵa jýyq adamnyń qatysýymen ázirlengen.
Sonymen birge, ornyqty damý jónindegi joǵary deńgeıdegi saıası forýmda qatysýshy elderdiń ókilderimen «suraq–jaýap» formatynda taqyryptyq dıalog uıymdastyryldy. Horvatııa delegatsııasy sholýdyń taldamalyq tereńdigine joǵary baǵa berdi. Memlekettik basqarý organdary men jeke sektorda áıelder kóshbasshylyǵyn ilgeriletetin quqyqtyq kvotalardy qosa alǵanda, ınstıtýtsıonaldyq tetikter týraly tolyǵyraq aqparat alý qajettigi aıtyldy. Buǵan jaýap retinde Qazaqstan QR Úkimetiniń 2024-2027 jyldarǵa arnalǵan Erler men áıelderdiń teń quqyqtary men múmkindikterin ilgeriletýdi qamtamasyz etý jónindegi is-qımyl josparyn, áıelder úshin tyıym salynǵan kásipter tizimin joıýdy, basshylyq pozıtsııalardaǵy áıelder úlesin 30%-ǵa deıin ulǵaıtý maqsatyn atap ótti.
Aýstrııa tarapy eńbek naryǵyn jastarǵa, áıelderge jáne halyqtyń osal toptaryna jahandyq túrlendirýge qatysty júrgizilip jatqan sharalardy monıtorıngteý men baǵalaý tetikterine qyzyǵýshylyq tanytty. Óz kezeginde Qazaqstan jumyssyzdyq deńgeıiniń 2024 jylǵy 4,7%-dan 2025 jylǵy birinshi toqsanda 4,6%-ǵa deıin tómendegenin habarlady. Buǵan qosa, jastarǵa baǵyttalǵan arnaıy baǵdarlamalar iske asyp keledi, ulttyq zańnamaǵa sáıkes, múgedektigi bar adamdardy jumysqa ornalastyrý úshin kvotalar júıesi jumys isteıdi.
Talqylaýda azamattyq qoǵammen ózara is-qımyl máseleleri de mańyzdy oryn aldy. Qıyndyqtar, taýarlardyń teńsizdikteri, qorshaǵan ortaǵa antropogendik qysym, áleýmettik qorǵaýdyń kúsheıýi atap ótildi. Osyǵan baılanysty eldegi ashyqtyqty kúsheıtý, áleýmettik qorǵaýdy kúsheıtý, teńsizdikti azaıtý jáne memleket pen azamattyq qoǵamnyń tıimdi ózara is-qımylyn jaqsartý jónindegi bolashaq sharalar týraly suraq qoıyldy. Qazaqstan delegatsııasynyń ókili sholýdy daıyndaý kezeńderinde azamattyq qoǵam belsendi túrde tartylǵanyn, al ODM-ǵa qol jetkizý monıtorıngi jónindegi parlamenttik komıssııa azamattyq bastamalarmen ári qaraıǵy yntymaqtastyqqa ashyq bolyp qalatynyn aıtty.
Shveıtsarııa Qazaqstannyń metan boıynsha Jahandyq mindettemege kirýine oń baǵa berdi. Qazaqstan osy bastamaǵa qatysý jónindegi óz mindettemesin rastap, metandy qysqartý 2060 jylǵa qaraı QR Kómirtegi beıtaraptyǵyna qol jetkizý strategııasyn iske asyrýǵa arnalǵan Jol kartasyndaǵy negizgi is-shara ekenin atap ótti. Metan shyǵaryndylaryn azaıtýǵa yqpal etetin tehnologııalar men tájirıbelerdi engizý josparlanyp otyrǵan kómir jáne munaı-gaz sektorlaryna erekshe nazar aýdarylady.
Eske sala ketsek, qarasha aıynda Ornyqty damý maqsattarynyń ulttyq ındıkatorlarynyń jańartylǵan tizbesi bekitildi.