Qazaqstan orman pıtomnıkterin damytýda Koreıa tájirıbesin qoldanady
ASTANA. KAZINFORM – Seýlde ótken Orman sharýashylyǵy jónindegi mınıstrlik forým aıasynda Qazaqstannyń Ekologııa jáne tabıǵı resýrstar vıtse-mınıstri Nurlan Sharbıev Koreıa orman qyzmetiniń basshylyǵymen jáne Azııa orman sektoryndaǵy yntymaqtastyq uıymynyń (AFoCO) atqarýshy dırektory Pak Chonhomen kezdesýler ótkizdi.
Kelissózderdiń negizgi taqyryptary — ormandardy qalpyna keltirý, zamanaýı tehnologııalardy engizý, orman pıtomnıkterin damytý, kómirtegi jobalaryn iske asyrý jáne halyqaralyq ınvestıtsııalar tartý.
AFoCO-men kezdesý qorytyndysynda ornyqty orman sharýashylyǵy jáne kómirtegi jobalary salasyndaǵy yntymaqtastyq týraly memorandým papkalarymen almasý rásimi ótti. Qujat aıasynda Qazaqstandaǵy 100 myń gektardan astam orman qorǵaý beldeýleri men agroorman-melıoratsııalyq aýmaqtardy qamtıtyn kómirtegi jobalaryn pysyqtaý kózdelgen.
Sondaı-aq bolashaq jobalardy Qazaqstan usynǵan «Ortalyq Azııanyń jasyl qalqany» óńirlik bastamasymen ushtastyrý múmkindikteri qarastyryldy.
Kezdesýlerdiń basty maqsaty — halyqaralyq tájirıbe men tehnologııalardy tarta otyryp, kelissózderdi Qazaqstan aýmaǵynda júzege asatyn naqty orman jáne kómirtegi jobalaryna aınaldyrý.
Aıta ketelik Qazaqstan 100 myń gektar jasandy orman qurý jobasyn bastaıtyny týraly jazǵan edik.
