Qazaqstan organıkalyq ónimderge ózi kýálik beretin bolady - IDM
ASTANA. QazAqparat - Qazaqstanda alǵash ret organıkalyq ónimderdi tekseretin zerthanalar akkredıtatsııadan ótip jatyr, dep habarlaıdy QazAqparat tilshisi.
Ulttyq akkredıtteý ortalyǵy bas dırektorynyń birinshi orynbasary Serik Qurmanǵalıevtiń aıtýynsha, buǵan deıin Qazaqstanda shyǵarylǵan organıkalyq ónimderdi sheteldiń zerthanalary tekserip, arnaıy kýálikter berip otyrdy. Endi, atalǵan sharalardy ózimizdiń zerthanalarymyz atqaratyn bolady. «Osy máseleni biz biraz ýaqyt talqyladyq. Astana men Almatyda kóptegen sharalar ótti. Parlament Májilisinde de keńinen qaradyq. Sóıtip, zańǵa ózgeris engizildi. Endi, taýarlarǵa kýálik beretin ózimizdiń mekemelerimiz organıkalyq ónimderge de ruqsat qaǵazdaryn bere alady. Negizi, Qazaqstanda organıkalyq ónimder kóp. Oǵan degen suranys ta joǵary. Biraq kýálik beretin organdardyń barlyǵy shetelde bolǵan. Qazir arnaıy standartter ázirlendi. Osy saladaǵy organdardy akkredıtatsııadan ótkizýge ázirmiz. Búginde alǵash ret organıkalyq ónimderdi tekseretin zerthanalar akkredıtatsııadan ótip jatyr», - dedi S.Qurmanǵalıev Astanada ótken baspasóz máslıhatynda.
Onyń aıtýynsha, bıyl elimizde alǵash ret parnıktik gazdardyń kólemin tekseretin zerthanalar da akkredıtatsııadan ótti. «Qazaqstanda shamamen 180 kásiporyn SO2 sııaqty parnıktik gazdardy aýaǵa artyǵymen shyǵaryp otyrady. Dál osy kásiporyndardy tekserý úshin jańa zerthanalar quryldy», - dep atap kórsetti S.Qurmanǵalıev.
Aıta keteıik, Ulttyq akkredıtteý ortalyǵy QR Investıtsııalar jáne damý mınıstrliginiń Tehnıkalyq retteý jáne metrologııa komıtetine qaraıdy.
Foto: mirmam.pro
