Qazaqstan OpenAI Edu for Countries halyqaralyq baǵdarlamasynyń alǵashqy legine qosyldy

ASTANA. KAZINFORM – OpenAI kompanııasy OpenAI for Countries jahandyq baǵdarlamasy aıasynda Edu for Countries bastamasynyń alǵashqy halyqaralyq legi iske qosylǵanyn jarııalady. Baǵdarlamaǵa qatysýshy elderdiń alǵashqy quramyna Qazaqstan, Estonııa, Sıngapýr, Birikken Arab Ámirlikteri, Iordanııa jáne Grekııa endi.

Ǵylym jáne joǵary bilim mınıstrligi málimetinshe, bul Qazaqstannyń ulttyq bilim berý júıesi men tsıfrlyq damý áleýetine degen halyqaralyq senimniń joǵary deńgeıin aıǵaqtaıdy.

Qazaqstannyń bul bastamaǵa qosylýy jasandy ıntellektiniń bilim berýge arnalǵan arnaıy nusqasy – ChatGPT Edu júıesin ulttyq bilim berý júıesine júıeli túrde engizýdiń bastalýyn bildiredi. Qazaqstan atalǵan halyqaralyq baǵdarlamaǵa qatysqan Ortalyq Azııadaǵy alǵashqy memleket atandy.

Edu for Countries baǵdarlamasyna qatysý elimizdiń bilim berý saıasaty úshin strategııalyq mańyzǵa ıe. Jasandy ıntellektiniń oqytý úderisine yqpaly jónindegi jahandyq pikirtalastar jaǵdaıynda Qazaqstan jasandy ıntellekt oqytýshyny almastyrmaıtynyn, kerisinshe onyń kásibı múmkindikterin kúsheıtetinin basshylyqqa alady. ChatGPT Edu júıesin qoldaný pedagogterdiń ákimshilik jáne ádistemelik júktemesin azaıtýǵa, sondaı-aq sapaly ári jekelendirilgen oqytýǵa qolaıly jaǵdaı jasaýǵa baǵyttalǵan.

Joba 2025 jylǵy 6 qarashada Memleket basshysynyń Amerıka Qurama Shtattaryna jasaǵan resmı sapary barysynda qol qoıylǵan yntymaqtastyq týraly memorandým aıasynda qol jetkizilgen kelisimder negizinde iske asyrylady. Negizgi kelisim OpenAI, Inc., Freedom Holding Corp. jáne óńirlik seriktes Bilim Group arasynda jasaldy. Joba memlekettik bıýdjet nemese syrtqy granttar tartylmaı, jeke qarajat esebinen júzege asyrylady. Bul – iskerlik qaýymdastyq tarapynan kórsetilgen senimdi qoldaýdyń aıqyn kórinisi.

– Qazaqstannyń Edu for Countries baǵdarlamasynyń alǵashqy halyqaralyq legine qosylýy Jasandy ıntellekt jáne tsıfrlandyrý jylymen tuspa-tus kelip otyr jáne bul bizdiń jasandy ıntellektini negizgi salalarǵa júıeli túrde engizýge baǵyttalǵan ustanymymyzdy kórsetedi. Biz ChatGPT Edu-di pedagogterdi qoldaýdyń jáne ǵylymı-zertteý ortasyn damytýdyń praktıkalyq quraly retinde qarastyramyz. Baǵdarlama ulttyq bilim berý standarttaryn, qaýipsizdik talaptaryn jáne teń qoljetimdilik qaǵıdatyn eskere otyryp iske asyrylady, – dep atap ótti QR Premer-mınıstrdiń orynbasary - Jasandy ıntellekt jáne tsıfrlyq damý mınıstri Jaslan Mádıev.

Qazaqstanda ChatGPT Edu júıesin engizý aıasynda eldiń bilim berý uıymdaryna 165 000 lıtsenzııany tegin berý kózdelgen, onyń ishinde:

✔ 100 000 lıtsenzııa – mektepke deıingi, orta, tehnıkalyq jáne kásiptik bilim berý pedagogterine;

✔ 62 800 lıtsenzııa – joǵary jáne joǵary oqý ornynan keıingi bilim berý uıymdarynyń oqytýshylary men ákimshilik qyzmetkerlerine;

✔ 2 200 lıtsenzııa – Astana Hub ekojúıesiniń qatysýshylaryna arnalǵan.

– Biz OpenAI kompanııasymen áriptestikti bolashaq bilim berý modeliniń negizin qalaıtyn biregeı joba retinde qarastyramyz, al ChatGPT Edu-di oqytýshy men zertteýshiniń múmkindikterin almastyrmaıtyn, kerisinshe keńeıtetin keshendi sheshim dep bilemiz. Jasandy ıntellekt – adamdy almastyratyn qural emes, synı oılaý men ony qoldaný mádenıeti qalyptasqan jaǵdaıda oılaý qabiletin kúsheıtetin qural. Bilim berý men ǵylymda JI oqý materıaldaryn ázirleýdi jedeldetýge, stýdenttermen keri baılanystyń sapasyn arttyrýǵa jáne zertteý jumystary úshin jańa múmkindikter ashýǵa jol ashady. Bul – Qazaqstanda básekege qabiletti, AI-saýatty akademııalyq ortany qalyptastyrýdyń mańyzdy bóligi. Qazaqstan bilim berýdi avtomattandyrýǵa emes, adam áleýetin keńeıtýge basymdyq beredi. Biz jasandy ıntellektini tek paıdalanatyn emes, ony jasaıtyn mamandardy daıyndaımyz, – dep atap ótti QR Ǵylym jáne joǵary bilim mınıstri Saıasat Nurbek.

ChatGPT Edu pedagogterge oqý materıaldaryn, tapsyrmalar men testterdi daıyndaýǵa, kontentti bilim alýshylardyń deńgeıine beıimdeýge, sondaı-aq qazaq, orys jáne aǵylshyn tilderinde oqý materıaldaryn ázirleýge múmkindik beredi. Jumystardy tekserý barysynda júıe baǵalaý krıterıılerin qalyptastyrýǵa jáne keri baılanys ázirleýge qoldanylýy múmkin, alaıda baǵalaýǵa qatysty barlyq sheshim tolyqtaı oqytýshynyń quzyretinde qalady.

– Biz jasandy ıntellektini bilim berý júıesine engizýdi pedagogterdiń rólin kúsheıtýge baǵyttalǵan strategııalyq qadam retinde qarastyramyz. Jasandy ıntellekt pedagogke tán emes birqatar mindetti óz moınyna alyp, onyń senimdi kómekshisine aınalady. ChatGPT Edu sekildi quraldar pedagogterdiń zııatkerlik seriktesine aınalyp, olardyń múmkindikterin keńeıtedi jáne árbir bilim alýshyǵa jeke tásildi kúsheıtedi. Jasandy ıntellekt – daıyn jaýaptardyń kózi emes, oılaý, jaýapkershilik jáne tsıfrlyq mádenıetti damytýǵa arnalǵan resýrs. Ol ártúrli daıyndyq deńgeıindegi oqýshylarǵa arnalǵan saralanǵan oqý materıaldaryn jedel ázirleýge, keri baılanystyń tıimdiligin arttyrýǵa jáne bilim alýshylardyń zamanaýı tehnologııalarmen jumys isteý daǵdylaryn qalyptastyrýǵa kómektesedi. Qazaqstan úshin jasandy ıntellektiniń passıvti tutynýshylary emes, onymen sanaly, synı jáne shyǵarmashylyq turǵyda árekettese alatyn urpaq tárbıeleý erekshe mańyzdy. Bizdiń maqsatymyz – adam kapıtalyn damytý jáne bolashaq syn-qaterlerine daıyn bilim berý ortasyn qalyptastyrý, – dedi QR Oqý-aǵartý mınıstri Juldyz Súleımenova.

2026 jylǵy qańtar aıynan bastap OpenAI mamandarymen birlesip, ChatGPT Edu júıesin bilim berý, ákimshilik jáne ǵylymı-zertteý qyzmetinde praktıkalyq turǵyda qoldaný boıynsha paıdalanýshylardy turaqty túrde oqytý uıymdastyrylady. Bul jasandy ıntellektini qoldanýda biryńǵaı tásilderdi qalyptastyrýǵa jáne pedagogterdiń tsıfrlyq ári AI-saýattylyǵyn arttyrýǵa múmkindik beredi.

Bilim berý uıymdary úshin aqparattyq qaýipsizdik pen derbes derekterdi qorǵaý salasyndaǵy zańnama talaptarynyń saqtalýyn qamtamasyz etetin arnaıy jumys keńistigi qarastyrylǵan.

– Astana Hub adamı kapıtaldy damytýǵa jáne ornyqty tehnologııalyq ekojúıe qalyptastyrýǵa erekshe mán beredi. Innovatsııalyq klaster aıasynda startap negizin qalaýshylar úshin komandalardy damytý men ónimderdi túrli damý kezeńderinde ilgeriletýge baǵyttalǵan ınkýbatsııalyq jáne akseleratsııalyq baǵdarlamalar júzege asyrylady, al bilim berý bastamalary joǵary bilikti mamandar daıarlaýǵa baǵyttalǵan. Edu for Countries bastamasyna qosylý jáne ChatGPT Edu quraldaryna qol jetkizý Tomorrow School peer-to-peer mektebi men Tech Orda baǵdarlamasynyń stýdentteri úshin bilim alý múmkindikterin keńeıtip, olardyń AI-quzyretterin damytýǵa jáne jasandy ıntellekt tehnologııalaryn tájirıbede qoldanýyna jol ashady, – dep atap ótti Astana Hub basqarýshy dırektory Valerııa Te.

ChatGPT Edu júıesin álemniń jetekshi bilim berý uıymdarynda engizýdiń halyqaralyq tájirıbesi bilim alýshylardyń qyzyǵýshylyǵynyń artqanyn, oqý materıaldarynyń sapasynyń jaqsarǵanyn jáne oqytýshylar ýaqytynyń ońtaılandyrylǵanyn kórsetip otyr. Bul nátıjeler tehnologııany Qazaqstannyń bilim berý júıesine kezeń-kezeńimen engizý barysynda eskeriletin bolady.

Aıta keteıik, OpenAI balalardy qorǵaý úshin ChatGPT-ge jasty tekseretin júıe engizedi.