Qazaqstan OPEK+ sheńberinde ózara baılanysty tereńdetýge nıetti - Oljas Bektenov
ASTANA. KAZINFORM - Oljas Bektenov pen OPEK bas hatshysy Haıtam Ál-Gaıs munaı salasyndaǵy ózara is-qımyl máselelerin talqylady, dep habarlaıdy QR Úkimetiniń baspasóz qyzmeti.
Qazaqstan Premer-Mınıstri Oljas Bektenov pen OPEK (The Organization of the Petroleum Exporting Countries) bas hatshysy Haıtam Ál-Gaıs álemdik munaı naryǵyndaǵy aǵymdaǵy ahýal men yntymaqtastyqtyń ózekti máselelerin talqylady.
Úkimet basshysy OPEK-tiń álemdik munaı naryǵynyń turaqtylyǵyn qamtamasyz etýdegi mańyzdy rólin atap ótti. OPEK+ sheńberindegi munaı óndirýshiler men eksporttaýshylardyń kelisilgen áreketteri oryn alýy yqtımal jaǵymsyz saldardy azaıtýǵa jáne naryqtaǵy jaǵdaıdy turaqtandyrýǵa kómektesedi.
«Qazaqstan OPEK+ sheńberinde ózara baılanystardy odan ári tereńdetýge nıetti. Biz árdaıym uıymnyń bastamalaryn qoldap, basqa eldermen qatar aǵymdaǵy erikti mindettemeler boıynsha shekteýlerdi de qabyldap otyrmyz», — dep atap ótti Oljas Bektenov.
Haıtam Ál-Gaıs Qazaqstannyń álemdik munaı naryǵyndaǵy mańyzdy rólin, elimizde qabyldanyp jatqan sharalardyń munaı naryǵyndaǵy teńgerim men boljamdy baǵa belgileýdi qamtamasyz etýge áserin atap ótti.
Kezdesý qorytyndysy boıynsha Oljas Bektenov pen Haıtam Ál-Gaıs ózara tabysty ári nátıjeli is-qımyldy jalǵastyrý nıetin rastady.
Aıta keteıik, Qazaqstan 2016 jyldan beri OPEK+ kelisiminiń qatysýshysy bolyp sanalady. Elimizde 90-nan astam jer qoınaýyn paıdalanýshy munaı óndirýmen aınalysady.
