Qazaqstan OPEK+ elderimen birge tamyzda munaı óndirý kólemin arttyrmaq
ASTANA. KAZINFORM — Qazaqstan, Saýd Arabııasy, Reseı, Irak, Kýveıt, Aljır jáne Oman 2026 jylǵy tamyzdan bastap munaı óndirý kólemin táýligine 188 myń barrelge ulǵaıtý týraly sheshim qabyldady.
OPEK-tiń resmı saıtynda jarııalanǵan málimetke sáıkes, 2023 jyldyń sáýiri men qarashasynda munaı óndirýge qosymsha erikti shekteý engizgen jeti memleket — Qazaqstan, Saýd Arabııasy, Reseı, Irak, Kýveıt, Aljır jáne Oman 2026 jylǵy 5 shildede beınekonferentsııa formatynda kezdesý ótkizdi. Taraptar álemdik munaı naryǵyndaǵy qazirgi ahýal men aldaǵy josparalaryn talqylady.
— Munaı naryǵynyń turaqtylyǵyn qoldaý jónindegi ujymdyq mindetteme aıasynda jeti qatysýshy el 2023 jylǵy sáýirde jarııalanǵan qosymsha erikti túzetýlermen salystyrǵanda óndiris kólemin táýligine 188 myń barrelge túzetý týraly sheshim qabyldady. Bul ózgeris kelisilgen kestege sáıkes 2026 jyldyń tamyz aıynan bastap kúshine enedi, — delingen habarlamada.
2023 jylǵy sáýirde jarııalanǵan qosymsha erikti shekteýler naryqtaǵy jaǵdaıǵa qaraı ishinara nemese tolyqtaı joıylyp ketýi múmkin. Bul jospar kezeń-kezeńimen júzege asyrylady. Sondaı-aq qatysýshy elder munaı naryǵyndaǵy jaǵdaıdy muqııat baqylap, ondaǵy ózgeristerdi turaqty túrde baǵalaı beredi.
OPEK+ quramyndaǵy jeti memleket bul sheshim qatysýshy elderdiń ótemaqy mindettemelerin oryndaý qarqynyn jedeldetýge múmkindik beretinin atap ótti. Sonymen qatar olar 2024 jyldyń qańtarynan beri belgilengen kólemnen artyq óndirilgen munaıdyń barlyǵyn tolyq óteıtinin taǵy bir márte rastady.
OPEK saıtynda jarııalanǵan kestege sáıkes, Qazaqstan tamyz aıynda munaı óndirý kólemin táýligine 10 myń barrelge arttyrýdy josparlap otyr. Sonyń nátıjesinde eldegi táýliktik munaı óndirý kólemi 1,618 mln barrelge jetpek.
Naryqtaǵy ahýal, kelisimderdiń oryndalýy jáne ótemaqy mindettemeleriniń júzege asyrylý barysy talqylanatyn OPEK+ quramyndaǵy jeti eldiń kelesi kezdesýi 2026 jylǵy 2 tamyzda ótedi.
Aıta keteıik, buǵan deıin Álemdik munaı naryǵyndaǵy ózgeristerdi jazǵan edik.
