Qazaqstan OPEK+ elderin ózara dıalogty qaıta bastaýǵa shaqyrdy
OPEK+ kelisimine qatysýshy elder mınıstrleriniń kelissózderi beınekonferentsııa formatynda ótti. Óz sózinde QR Energetıka mınıstri Nurlan Noǵaev Qazaqstan syndarly dıalogtyń jaqtaýshysy bolǵanyn jáne bolyp qala beretinin atap ótti.
«OPEK+ formatyndaǵy munaı óndirýshi elder arasyndaǵy dıalogty qaıta bastaý mańyzdy oqıǵa. Búgingi otyrys álemdik munaı ındýstrııasy tarıhynda óz ornyn alar dep esepteımin», - dedi Noǵaev.
Ǵalamdyq ekonomıkalyq ósim baıaýlaǵan jaǵdaıda munaıǵa degen suranystyń tómendeýi baǵanyń odan ári tómendeýine, sonymen birge álemdik munaı óndirisiniń tómendeýine jaǵdaı jasaıdy. Negizgi munaı óndirýshi elder arasynda úılesimdi is-qımyldyń bolmaýy onsyz da kúrdeli jaǵdaıdy qıyndata túsýde.
Mınıstr Qazaqstan OPEK+ kelisiminiń qatysýshysy bola otyryp, árqashan óz mindettemelerin oryndaǵanyn atap ótti.
«Biz aldaǵy kelissóz qorytyndysy boıynsha oń nátıjege qol jetkizemiz degen úmittemiz. Bul rette álemdik munaı naryǵyndaǵy baıqalǵan teńgerimsizdik tek OPEK+ elderiniń kúsh-jigeri jetkiliksiz bolatynyn jáne jaǵdaı naryqtyń barlyq qatysýshylarynyń belsendi qatysýyn talap etetinin kórsetip otyr. Biz óz kezegimizde búgingi kún tártibiniń ózektiligin túsinemiz. Munaı óndirýdi jalpy qysqartýǵa qatysýǵa daıynbyz», - dedi Nurlan Noǵaev.
On bir saǵatqa sozylǵan kelissóz nátıjesinde taraptar qandaı da bir kelisimge kele alǵan joq. Qazaqstan óz kezeginde aldaǵy ýaqytta munaı óndirý kólemin qysqartý boıynsha kollektıvti ortaq sheshim qabyldanady dep úmittenedi. Bul shara óz kezeginde munaı ındýstrııasyna oń áserin tıgizedi.
Eske sala ketsek, Nurlan Noǵaev bastaǵan qazaqstandyq delegatsııa ótken aıda Avstrııada ótken OPEK+ birlesken mınıstrlik monıtorıng komıtetiniń 18-otyrysyna qatysqan bolatyn. Onda álemdik munaı naryǵyn turaqtandyrý jóninde tıisti usynystar qaraldy.
