Qazaqstan ońtústikkoreıalyq týrıster úshin tartymdy baǵytqa aınaldy
ASTANA. KAZINFORM – Qazaqstan Ońtústik Koreıanyń saıahatshylary úshin Ortalyq Azııadaǵy jańa tanymal aımaqqa aınalyp keledi. Bul týraly Kazakh Tourism habarlady.
Agoda tsıfrlyq týrıstik platformasynyń derekterine sáıkes, 2025 jyldyń qańtar-qazan aılary aralyǵynda elimizge degen izdeý suranysy 295 paıyzǵa artqan.
Bıyl ońtústikkoreıalyq týrıster tarapynan Qazaqstan boıynsha týrlar men ornalastyrý oryndaryn izdeý belsendiligi aıtarlyqtaı óskeni baıqalady. Sarapshylar bul úrdisti eki el arasyndaǵy tikeleı áýe qatynasynyń keńeıýimen baılanystyrady.
Agoda derekterine qaraǵanda, ońtústik astanaǵa qyzyǵýshylyqtyń artýyna Eastar Jet áýe kompanııasynyń Inchhon – Almaty baǵytyn iske qosýy yqpal etken. Osy baǵyt boıynsha izdeý suranysy 348 paıyzǵa kóbeıgen. Sondaı-aq Shymkent qalasyna qyzyǵýshylyq 89 paıyzǵa ósken. Bul ósimge mamyr aıynda SCAT áýe kompanııasynyń Inchhonnan tikeleı reıs ashýy sep boldy.
Sonymen qatar Air Astana Seýl – Almaty jáne Seýl – Astana baǵyttaryndaǵy áýe tasymalynyń jıiligin arttyrǵan.
Agoda kompanııasynyń Soltústik Azııa boıynsha óńirlik dırektory Djeı Lı ońtústikkoreıalyq týrısterdiń mádenıet, shytyrman jáne shynaıylyqty biriktiretin baǵyttarǵa qyzyǵýshylyǵy artqanyn atap ótti.
— Biz ońtústikkoreıalyq saıahatshylardyń shytyrman, mádenıet jáne shynaıylyqty biriktiretin baǵyttarǵa degen qyzyǵýshylyqtarynyń aıqyn óskenin ańǵaramyz. Bul rette Ortalyq Azııa qyzyǵýshylyq deńgeıi artyp kele jatqan aımaq retinde erekshelenedi, — dedi ol.
Jalpy alǵanda, Ortalyq Azııa elderine qatysty izdeý suranystarynyń jıyntyq kólemi ótken jyldyń sáıkes kezeńimen salystyrǵanda 225 paıyzǵa ulǵaıǵan.
Kazakh Tourism Ońtústik Koreıada Qazaqstannyń týrıstik áleýetin ilgeriletý boıynsha júıeli jumysty jalǵastyrýda. Bıyl eki eldiń jetekshi týrıstik kompanııalary arasynda seriktestikti damytý maqsatynda V2V-kezdesýler men aqparattyq týrlar uıymdastyryldy.
Aıta keteıik, Qazaqstannyń ulttyq kıimderi Seýlde úlken qyzyǵýshylyq týǵyzdy.