Qazaqstan Ońtústik Koreıaǵa tabıǵı ýran jetkizýdi qaıta bastaıdy – Murat Nurtileý

Qazaqstan Ońtústik Koreıaǵa tabıǵı ýran jetkizýdi qaıta bastaıdy. Bul týraly «Ortalyq Azııa – Koreıa Respýblıkasy» 16-yntymaqtastyq forýmynda Premer-Mınıstrdiń orynbasary – Syrtqy ister mınıstri Murat Nurtileý aıtty, dep habarlaıdy Kazinform tilshisi Kazinform.

«Sóz sońynda ózara is-qımylymyzdyń qosymsha jan-jaqty paıymdaýdy qajet etetin keıbir mańyzdy aspektisine nazar aýdarǵym keledi. Keıingi birneshe jylda bizdiń saýda-ekonomıkalyq baılanystarymyzda oń úrdis baıqalǵanynan bastaıyn. Ortalyq Azııanyń Ońtústik Koreıamen saýda kólemi 2022 jyly oń dınamıkany kórsetip, shamamen 8 mlrd dollardy qurady. Osy taýar aınalymynyń 70 paıyzdan astamy Qazaqstanǵa tıesili. Ońtústik Koreıa turaqty túrde bizdiń ekonomıkamyzdaǵy eń iri 10 ınvestordyń qataryna kiredi», - dedi Murat Nurtileý. 

Qazaqstan Syrtqy ister mınıstri búginde elimizde avtomobıl jasaý, jańa ozyq tehnologııalar men bilim berý, energetıka, medıtsına syndy salalarda 2 mlrd dollar somasyna 30-ǵa jýyq aýqymdy ınvestıtsııalyq joba bar ekenin atap ótti. Sonymen qatar kómirsýtek shıkizatyn jetkizý salasynda da úlken perspektıvalar baryn tilge tıek etti.  

Onyń dereginshe, Ótken jyly Ońtústik Koreıaǵa qazaqstandyq munaıdyń jetkizilimi 2 eseden ósti. Bıyl 8 aıda bul kórsetkish 4,6 mln tonnaǵa deıin artty. 

«Buǵan qosa, keleshekte Qazaqstan Ońtústik Koreıaǵa tabıǵı ýrandy uzaq merzimdi jetkizýdi qaıta bastaıdy. Sonymen qatar biz Ońtústik Koreıaǵa munaı hımııasy, metallýrgııa, aýyl sharýashylyǵy jáne azyq-túlik ónimderiniń eksportyn ulǵaıtýǵa daıynbyz. Óńirdegi kórshilerimizdiń de óz rezervteri bar ekenine senimdimin. Joǵaryda aıtylǵandardy eskere otyryp, forýmnyń kelesi otyrysynyń kún tártibine energetıka, aýyl sharýashylyǵy jáne sırek metaldar sııaqty basym baǵyttardy engizýdi usynamyn», - dep túıindedi sózin Murat Nurtileý.