Qazaqstan óńirlik kólik habyn damytýǵa baǵyttalǵan kelisimderge qosyldy
ASTANA. KAZINFORM — Qazaqstan Bishkektegi halyqaralyq kólik forýmyna qatysyp, birqatar mańyzdy qujattarǵa qol qoıdy. Bul týraly Kólik mınıstrligi málim etti.
Bishkekte Qazaqstan Respýblıkasy Kólik mınıstrliginiń ókilderiniń qatysýymen «Qyrǵyzstan — óńirlik hab: qurlyqtardy baılanystyrý» atty halyqaralyq kólik forýmy ótti. Forým aıasynda Shanhaı yntymaqtastyq uıymy jáne Túrki memleketteri uıymy sheńberinde kólik mınıstrlikteri basshylarynyń kezdesýleri de uıymdastyryldy.
— ShYU-ǵa múshe memleketterdiń kólik mınıstrlikteri basshylarynyń 13-shi keńesi aıasynda qazaqstandyq tarap kún tártibindegi negizgi máseleler boıynsha aqparat usynyp, halyqaralyq avtomobıl tasymaldaryna ruqsattardy tsıfrlandyrý salasyndaǵy ózara is-qımyl jónindegi ShYU-ǵa múshe memleketterdiń ýákiletti organdary arasyndaǵy ózara túsinistik týraly memorandýmǵa qol qoıdy, — dep habarlady vedomstvodan.
Sonymen qatar, keńes barysynda taraptar ShYU-ǵa múshe memleketter arasyndaǵy kólik salasyndaǵy yntymaqtastyqty damytý jónindegi arnaıy jumys toby týraly erejeni kelisti. Sondaı-aq mýltımodaldy qurlyqtaǵy júk tasymaldaryn basqarýǵa arnalǵan ShYU-nyń biryńǵaı tsıfrlyq platformasyn qurý tujyrymdamasynyń jobasyn qosa alǵanda, birqatar ózge de qujattar talqylandy.
— Kezdesý qorytyndysy boıynsha ShYU-ǵa múshe memleketterdiń yntymaqtastyǵyn odan ári damytý jónindegi ýaǵdalastyqtardy bekitken qorytyndy hattamaǵa qol qoıyldy. TMU-ǵa múshe memleketterdiń kólik vedomstvolary basshylarynyń 9-shy kezdesýi barysynda Qazaqstan tsıfrlandyrýdy engizý jáne uıymǵa múshe elderdiń memlekettik shekaralarynan ótý úderisterin jeńildetý jumystarynyń aıryqsha mańyzyn atap ótti, — delingen habarlmada.
Atap aıtqanda, elektrondyq júkqujatyn (e-CMR) engizý jáne sheteldik ruqsat blankilerimen elektrondy almasý júıesin (e-Permit) keńeıtý, onyń ishinde jasandy ıntellekt elementterin paıdalaný jumystary erekshe atap ótildi. Іs-shara qorytyndysy boıynsha Túrki memleketteri uıymyna múshe elderdiń kólikke jaýapty mınıstrlikteri arasynda e-CMR engizý jónindegi ózara túsinistik týraly memorandýmǵa qol qoıyldy. Tsıfrlyq sheshimderdi odan ári engizý jónindegi qol jetkizilgen ýaǵdalastyqtar kezdesý qorytyndysy boıynsha qol qoıylǵan birlesken kommıýnıkede de bekitildi.
Buǵan deıin Qazaqstanda kólik ınfraqurylymy jańaryp, tranzıt kólemi birneshe esege óskenin jazdyq.
