Qazaqstan óńirlerinde jańajyldyq shyrsha baǵasy qansha
ASTANA. KAZINFORM – Elimizdegi dúkender men marketpleısten jasandy shyrshany ońaı tabýǵa bolady. Al tiri shyrshany keziktirý qıyn. Kazinform agenttiginiń tilshisi mereke aldynda ekeýiniń baǵasyn salystyryp kórdi.
Tiri shyrsha
Jańa jyl merekesine oraı arnaıy kesip, bazarǵa ákelip satatyn shyrshany kez kelgen qaladan keziktire almaımyz. Óńirlerge shyrsha Reseıden ákelinedi.
Tiri shyrsha tabyla qalǵan kúnniń ózinde baǵasy bıiktigine, aǵashtyń qalyńdyǵy men túrine qaraı ártúrli bolady. Qaraǵaı baǵasy arzan, al maıqaraǵaı baǵasy oǵan qaraǵanda qymbat. Reıtıng kezinde kóp jerde kezigetin qaraǵaı baǵasyn salystyrdyq.
Elimiz boıynsha Kókshetaý qalasynda baǵa tómen. Jańa jylda úıińizdiń tórine quny 2 500 teńge turatyn qaraǵaıdy satyp alsańyz bolady. Sonymen birge Qostanaı qalasynda jasyl jelek baǵasy 3 000 teńge bolyp tur.
Jezqazǵan, Qaraǵandy, Oral qalalarynda qaraǵaı baǵasy 4 000 teńgeden bastalady. Keı jerlerde onyń baǵasy 10 000 teńge bolsa, taǵy bir bazardan 15 000 teńgege satyp alasyz.
Pavlodar, Atyraý qalalarynda tiri shyrsha baǵasy 5 000 teńgeden bastalady. Al Qazaqstannyń astanasynda, sonymen birge Almatyda baǵa 6 000 teńge jáne odan joǵary. Bul qalalarda tegin jetkizý qyzmeti bar jáne keıbiri úıińizge kelip, shyrshany qondyryp beredi.
Semeı men Pavlodarda baǵa 7 000 teńgeden bastalady. Biraq tógilip turǵan qaraǵaı baǵasy 15 000 teńgege deıin jetedi.
Túrkistan men Aqtóbe qalasynda tiri shyrsha baǵasy 10 000 teńge. Bul qalalarda ózge óńirlerge qaraǵanda baǵa joǵary bolyp tur. Biraq Shymkent qalasynda shyrsha quny odan da qymbat. Eń arzany munda – 20 000 teńge.
Al Taraz, Qyzylorda, Taldyqorǵan, Aqtaý men Óskemen qalalarynan tiri shyrsha tabý múmkin bolmady.
Jasandy shyrsha
Elimizde jasandy sharshanyń túri óte kóp. Adamdar 50 000 teńgege, tipti 300 000 teńgege shyrsha satyp ala alady.
Reıtıng jasaǵan kezde uzyndyǵy 1,8 metr bolatyn shyrsha baǵasyn salystyrdyq. Onyń ishinde aq ulpa jamyrǵany, jasyly men aralas túri bar. Qazir bul úsh túri saýda oryndarynda óte kóp jáne suranys ta joǵary.
Kókshetaý qalasynda tiri jáne jasandy shyrsha baǵasy tómen bolyp shyqty. Munda shyrsha baǵasy – 6 500 teńge. Tógilip turmasa da, merekelik kóńil kúı syılaıdy.
Kóp qalada jasandy shyrsha baǵasy – 10 000 teńge. Mundaı baǵa Astana, Qaraǵandy, Qostanaı, Oral, Petropavl, Taraz, Qyzylorda men Jezqazǵan qalalarynda kezdesedi. Tek sharshanyń arzany qaıda satylatynyn bilý kerek. Úı janyndaǵy dúken men sýpermarketten mundaı baǵada shyrsha alý áste múmkin emes.
Óskemen qalasynda baǵa 12 000 teńgeden bastalady. Al Pavlodar, Taldyqorǵan, Aqtaý, Atyraý men Semeıde birneshe jyl qyzmet kórsete alatyn shyrshany 15 000 teńge satyp alsa bolady.
Almatyda shyrsha baǵasy 18 000 teńgeden bastalady. Al Túrkistanda bıiktigi 1,8 metrlik jasyl jelekti 20 000 teńgege satyp alasyz.
Aqtóbe men Shymkent qalalarynda baǵa joǵary. Munda shyrshany 40 000 teńgege satyp alýǵa bolady. Shymkentte tiri shyrsha baǵasy da elimiz boıynsha qymbat.
Buǵan deıin korporatıv keshiniń, mandarın men qyzyl jáne qara ýyldyryqtyń baǵasy týraly jazyldy.