Qazaqstan óńirlerinde sý tasqynyna qarsy daıyndyq jumystary kúsheıtildi
ASTANA. KAZINFORM – 2026 jylǵy sý tasqyny qaýpi bar kezeńniń qarsańynda eldi mekenderdi qorǵaýǵa, ınfraqurylymnyń ornyqtylyǵyn qamtamasyz etýge jáne sý basý qaterlerin azaıtýǵa baǵyttalǵan ınjenerlik is-sharalar el óńirlerinde belsendi júrgizilýde, dep habarlaıdy TJM.
Qaraǵandy oblysynda sý tasqyny qaýpi joǵary ýchaskelerde tekserý jumystary júrgizilýde. Jergilikti atqarýshy organdarǵa jospardaǵy is-sharalardy tolyq oryndaý tapsyryldy. Búgingi tańda josparlanǵan 138 is-sharanyń 53-i aıaqtaldy, qalǵan 85-i jalǵasýda. Jospar aıasynda 12 km qorǵanysh bógenderi men úıindiler salyndy jáne nyǵaıtyldy, 17,5 km ózen arnalarynda sanıtarlyq jumystar atqaryldy, 700 metr sý aǵyzý arnalary salyndy jáne jóndeldi, 2 km-den astam nóser káriz júıesi tazartyldy, avtojoldardyń 17 ýchaskesinde sý ótkizý qabileti arttyryldy, 2 gıdrotehnıkalyq qurylysqa jóndeý jasaldy.
Pavlodar oblysynda qorǵanysh qurylystaryn nyǵaıtý jáne ınfraqurylymdy qorǵaý sharalary júrgizilýde. Aqsý qalasynda uzyndyǵy 1,1 km aryq júıesi salyndy, jylyjaı keshenine kirme jol jóndelip, sý ótkizý qubyry ornatyldy. Jambyl, Jańajol, Qaraaǵash, Marǵulan aýyldarynda gıdromelıoratıvtik qurylystardy qaıta jańartý jumystary atqaryldy. Baskól aýylynda erigen jáne jańbyr sýlaryn burý úshin 4 sý ótkizý qubyry ornatyldy. Sonymen qatar respýblıkalyq, oblystyq jáne aýdandyq mańyzy bar joldarda 20-dan astam sý ótkizý qubyry jóndeldi.
Soltústik Qazaqstan oblysynda sý tasqynyna qarsy sharalar sheńberinde turǵyn úıler men áleýmettik nysandardy qorǵaý úshin topyraq úıindileri turǵyzylyp jatyr. Mámlút qalasy mańyndaǵy Glýbokoe kólinde sýdyń deńgeıin azaıtý jumystary atqarylýda. Josparlanǵan 37 is-sharanyń 12-si oryndalyp, qalǵany daıyndyq kezeńinde. Negizgi avtojoldarda erigen jáne jańbyr sýlaryn ótkizý úshin sý ótkizý qubyrlary ornatylýda.
Jergilikti atqarýshy organdar men jol qyzmetteri jumystardy jer bederiniń erekshelikterin eskere otyryp jalǵastyrýda. Sý tasqynyna daıyndyq óńirlerdiń basty basymdyqtarynyń biri bolyp qala bermek.
Aıta keteıik, Qazaqstan men AQSh sý tasqynyn boljaıtyn ozyq tehnologııalardy engizý máselesin talqylady.