Qazaqstan óńirlerinde akvaparkke kirý bıletiniń quny qansha
ASTANA. KAZINFORM - Qazaqstannyń keıbir óńirinde akvapark joq. Al akvaparki bar óńirlerde kirý quny 1700 teńgeden bastalyp, 16 000 teńgege deıin jetedi dep habarlaıdy Kazinform tilshisi.
Qyzmet túri men qoljetimdiligi
Qazaqstannyń keıbir qalasynda akvapark joq. Bolǵan kúnniń ózinde kóbinde jalǵyz ǵana sýǵa túsý orny qarastyrylǵan. Qazirgi kezde Oral, Jezqazǵan, Kókshetaý, Qostanaı men Pavlodardan akvapark tappaısyz. Sońǵy eki qalada qurylys jumystary júrip jatyr.
Al akvaparki bar qalalarda qyzmet túri árqıly. Keıbir akvaparkte kúni boıy tynyǵýǵa múmkindik bolsa, ekinshi biri ýaqytty shektep, 3-4 saǵat dep talap qoıady. Sonymen birge aıaq kıim men súlgini jalǵa alýǵa bolady. Akvaparktegi syrǵanaqtyń túri, saýna da baǵaǵa áser etedi. Keıbir óńirde kópbalaly otbasyna, múgedektigi bar adamdarǵa jeńildik bar. Ereje boıynsha 3 nemese 4 jasqa tolmaǵan balalarǵa kirý tegin. Al Óskemen 6 aılyqqa deıingi balalar ǵana tegin kire alady. Ózgelerge kirý aqyly. Alty aılyq sábıden bastap 1 jastaǵy balalarǵa kirý bıletiniń teń jartysyn tóleıdi. Sonymen birge jumys kúnderi kirý quny arzan bolsa, demalys kúnderi keıbir akvaparkter baǵasyn kóteredi.
Qaı óńirde qymbat?
Eń arzany Qyzylorda qalasynda. Munda jumys kúnderi bir balaǵa kirý bıletiniń quny 1700 teńge. Demalys kúnderi baǵa kóteriledi. Eresekterge kirý quny – 6000 teńge. Jalpy elimizde eresekterge arnalǵan bılet balalarǵa qaraǵanda 1000-2000 teńgege joǵary.
Kirý bıletiniń quny arzan óńirler tizimi boıynsha ekinshi orynda Túrkistan, Taldyqorǵan men Semeı tur. Munda balalarǵa arnalǵan bılet baǵasy 2000 teńgeden bastalady. Osy qalalardyń ishinde baǵa Túrkistanda joǵary. Munda bılet quny – 4000 teńge. Al Semeıde akvaparkke kirý kezinde bala men eresek dep bólmeı, bárine bir tarıf usynylady. Tek demalys kúnderi bılet baǵasy ádettegiden 2500 teńgege qymbat bolyp keledi. Al Taldyqorǵanda bul aqshaǵa úrmeli akvapark qyzmetin paıdalanýǵa bolady. Munda da syrǵanaq, basseın bar. Tek bári ashyq aspan astynda nemese úrmeli akvapark ishinde.
Reıtıng boıynsha kelesi kezekte Shymkent qalasy tur. Munda baǵa 2500-6000 teńge aralyǵynda. Qala úlken, soǵan sáıkes birneshe akvapark jumys isteıdi. Al baǵa birkelki.
Atyraýda baǵa 3000-12000 teńge aralyǵynda. Munda demalysqa arnalǵan eki oryn bar. Birinde baǵa 6000 teńgege deıin barady. Odan ári Qaraǵandy qalasy jaıǵasty. Munda baǵa 3500-5500 teńge aralyǵynda. Taraz qalasyn da bir jabyq, bir ashyq akvapark bar. Bılet quny 3600 – 5200 teńge aralyǵynda.
Aqtaýda akvaparkke kirý quny balalarǵa 4000 teńgeden bastalady. Eresekter úshin 8000 teńge bolyp tur. Shilde aıyndaǵy baǵasy osy. Al maýsymda kirý quny arzan boldy.
Aqtóbe, Petropavlda akvaparkke kirý quny 5000 teńgeden bastalady. Osy tizimge Býrabaıdy da qosýǵa bolady. Munda kókshetaýlyqtar barady. Kýrorttyq aımaqta baǵa 10 000 teńgege deıin jetedi.
Óskemende 5500 teńge tólep, kúni boıy sýly syrǵanaqta syrǵanaýǵa bolady. Munda da kirý bıletiniń quny bala men eresekterge dep bólinbeıdi. Al demalys kúnderi baǵa 8000 teńge bolyp tur.
Almatyda akvapark kóp. Soǵan qaramastan bul baǵaǵa esh áser etpeı tur. Eń arzan bılet quny balalarǵa 6000 teńgeden bastalady. Al eń qymbaty eresekter úshin 16 000 teńge.
Qazaqstan boıynsha Astanada akvapark qyzmeti qymbat. Astanada 4 saǵattyq qyzmet balalarǵa 6600 teńge bolsa, eresekterge 12 200 teńge. Kúni boıy akvaparkte júrgińiz kelse, 14 jasqa tolmaǵan balalarǵa 8600-9000 teńge, al ózgelerge 14 000-15200 teńge tóleýge týra keledi.
Aıtyp óteıik, buǵan deıin balalar lagerine joldama quny týraly jazyldy.
Sonymen birge anımatorlardyń quny saralandy.
Jaz aılarynda qarbyz ben qaýynnyń da baǵasyn bildik.