Qazaqstan óńirdegi iri avıatsııalyq hab ataný úshin ne isteıdi
ASTANA. KAZINFORM — 2030 jylǵa qaraı Qazaqstan áýe tasymalyn 26 mıllıon jolaýshyǵa jetkizýdi josparlap otyr. Bul týraly Kólik mınıstrligi Azamattyq avıatsııa komıtetiniń tóraǵasy Saltanat Tompıeva elordada «Ortalyq Azııa + Qytaı» avıatsııa máseleleri jónindegi yntymaqtastyq jumys tobynyń konferentsııasynda aıtty.
Onyń aıtýynsha, 2024 jyly Qazaqstan áýe kompanııalary shamamen 15 mıllıon jolaýshyny tasymaldady. Bul 2023 jylmen salystyrǵanda 11 paıyzǵa kóp. Qazir bul kórsetkish ótken jylmen salystyrǵanda 14 paıyzǵa artyq.
— Biz sondaı-aq áýe tasymalynyń qaýipsizdigine erekshe kóńil bólemiz. Bizdiń IKAO standarttaryna sáıkestigimiz 82 paıyz, bul halyqaralyq ortasha deńgeıden joǵary. Máselen, Eýropada bul kórsetkish 76 paıyzǵa jetedi. Osynyń arqasynda biz EO-nyń senimine ıe bolyp, halyqaralyq qyzmetter kórsetý múmkindigin aldyq. IKAO prezıdentiniń Qazaqstanǵa kelýi de yntymaqtastyqty damytý múmkindikterin talqylaıtyn mańyzdy múmkindik boldy. Biz qaýipsizdikke basymdyqty eń joǵary deńgeıde saqtaımyz. Byltyr avıatsııa salasyndaǵy memlekettik organdar 961 tekseris júrgizip, 986-nan astam ruqsat berdi, — dedi Saltanat Tompıeva konferentsııanyń ashylýynda.
Búgingi tańda Qazaqstannyń ishki naryǵy 61 baǵyt boıynsha jumys isteıdi, aptasyna 849 reıs oryndalady. Bul kórsetkishter ishki suranys talaptaryna saı keledi.
— Biz ishki jáne halyqaralyq áýe reısteri men tasymaldar sanyn ulǵaıtýdy kózdep otyrmyz. 2022 jyly 21 halyqaralyq baǵyt ashylsa, bıyl 36 jańa baǵyt ashý josparlanǵan. Alty jańa loýkost áýe kompanııasyn iske qosý kózdelip otyr. 2024 jylǵy 14,7 mıllıon jolaýshy tasymalyn eki ese kóbeıtip, 2030 jyly 26 mıllıonǵa jetkizýdi josparlap otyrmyz. Tranzıttik jolaýshylar sanyn 338 myńnan 1,1 mıllıonǵa deıin úsh ese arttyrý kózdelgen. Bul batyl maqsat Qazaqstannyń óńirdegi iri avıatsııalyq hab retindegi rólin nyǵaıtady. Júk tasymaly da bizdiń basymdyqtarymyzdyń biri, 2030 jylǵa qaraı ony 500 myń tonnaǵa jetkizýdi josparlap otyrmyz, — dedi komıtet tóraǵasy.
Sonymen birge, Prezıdent tapsyrmasymen 6 óńirde — Astana, Almaty, Aqtóbe, Qaraǵandy, Shymkent, Aqtaý áýejaılaryn aerohab retinde damytý jumystary qolǵa alynǵan. Onyń ishinde Almaty men Astana áýejaılaryn sheteldik ınvestorlar basqaryp, damytýǵa mol qarajat bólip otyr.
Buǵan deıin Azamattyq avıatsııa komıteti tóraǵasynyń orynbasary Darhan Katyshev aldaǵy ýaqytta Qazaqstannan qaı qalalarǵa áýe reısi ashylatynyn aıtyp bergen edi.
Tokıo, Sıngapýr, Nıý-Iork: Qazaqstannan qaı qalalarǵa áýe reısi ashylady
Sondaı-aq, bir jylda Qazaqstan men Qytaı áýe qatynasy 18 reıske kóbeıip, 78-ge jetken.