Qazaqstan óńirde alǵash bolyp Pax Silica bastamasyna qosyldy
ASTANA. KAZINFORM - Qazaqstan óńirdegi alǵashqy memleket retinde halyqaralyq Pax Silica bastamasyna resmı túrde qosyldy.
Qazaqstan Respýblıkasynyń Pax Silica-ǵa qosylýy týraly deklaratsııaǵa, sondaı-aq AI Opportunity Partnership boıynsha birlesken málimdemege Qazaqstan Respýblıkasy Premer-Mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıev qol qoıdy. Qol qoıý rásimi Donald Tramp atyndaǵy Beıbitshilik ınstıtýtynda AQSh Memlekettik departamentiniń qoldaýymen ótti.
Bul qujattarǵa qol qoıý Qazaqstandy 15 memlekettiń (Avstralııa, Fınlıandııa, Grekııa, Úndistan, Izraıl, Japonııa, Norvegııa, Katar, Koreıa Respýblıkasy, Sıngapýr, Shvetsııa, Fılıppın, Birikken Arab Ámirlikteri, Ulybrıtanııa jáne Taıvan) basyn qosqan halyqaralyq tehnologııalyq alıans quramyna resmı túrde engizedi.
Pax Silica — jańa AI-ekonomıka úshin senimdi jetkizý tizbekterin damytýǵa baǵyttalǵan tehnologııalyq yntymaqtastyq jónindegi halyqaralyq bastama. Ol seriktes elderdi jasandy ıntellekt, mańyzdy mıneraldar, jartylaı ótkizgishter, derekter ortalyqtary, energetıkalyq ınfraqurylym, joǵary tehnologııalyq óndiris, zertteýler jáne kadrlar daıarlaý tóńireginde biriktiredi.
Qazaqstannyń Pax Silica-ǵa qatysýy Prezıdent Qasym-Jomart Toqaevtyń tsıfrlyq el qurý jáne ekonomıkany, memlekettik basqarýdy, ǵylymdy, bilim men ónerkásipti jańǵyrtýdyń negizgi faktorlarynyń biri retinde jasandy ıntellektti jedel damytý jónindegi kún tártibine sáıkes keledi.
Qazaqstan úshin Pax Silica-ǵa qosylý ınvestıtsııalar tartý, tehnologııalyq seriktestikti keńeıtý, joǵary tehnologııalyq óndiristi damytý jáne eldiń jahandyq jetkizý tizbegindegi rólin nyǵaıtý úshin jańa múmkindikter ashady.
Qazaqstan bul bastamaǵa birqatar strategııalyq artyqshylyqtardy usynady: mańyzdy mıneraldar salasyndaǵy aıtarlyqtaı áleýet, energetıkalyq resýrstar, Eýropa men Azııa arasyndaǵy tıimdi geografııalyq ornalasý, damyp kele jatqan tsıfrlyq ınfraqurylym, ósip kele jatqan IT-ekojúıe jáne jasandy ıntellektti damytýdyń aıqyn ulttyq baǵyty.
Yntymaqtastyqtyń negizgi baǵyttarynyń biri mańyzdy mıneraldardy qaıta óńdeý jáne qosylǵan quny joǵary óndiristerdi damytý bolýy múmkin. Qazaqstan shıkizat eksporttaýdan tysqary shyǵyp, tehnologııalyq tizbektiń kúrdelirek býyndaryn, onyń ishinde akkýmýlıatorlarǵa, jartylaı ótkizgishterge, energııa jınaqtaý júıelerine, AI-ınfraqurylymǵa jáne basqa da joǵary tehnologııalyq sheshimderge arnalǵan komponentterdi damytýdy maqsat etedi.
AQSh Úkimeti sondaı-aq bastamaǵa qatysýshy elderde Foundry Schools jelisin qurýdy kózdeıtin Stenford ýnıversıtetimen memorandýmǵa qol qoıdy. Baǵdarlama joǵary tehnologııalyq salalar úshin joǵary bilikti mamandar daıarlaýǵa baǵyttalǵan. Onyń ishinde esepteý materıaltanýy, ónerkásip pen jer qoınaýyn paıdalanýda jasandy ıntellektti qoldaný, sondaı-aq ınjenerlik jáne tsıfrlyq baǵyttar boıynsha ózge de ozyq salalar qamtylady.
Pax Silica-ǵa qatysý ınfraqurylymdyq jáne tehnologııalyq jobalardy qarjylandyrý úshin qosymsha múmkindikter týǵyzýy múmkin.
— Búginde jańa AI-ekonomıka qalyptasýda, onda jasandy ıntellekt tek tsıfrlyq tehnologııa ǵana emes, sonymen qatar jańa ónerkásiptik júıeniń negizine aınalýda. Árbir AI-sheshimniń artynda energııa, mańyzdy mıneraldar, esepteý qýattary, derekter ortalyqtary, jartylaı ótkizgishter, ınjenerlik kadrlar jáne qorǵalǵan jetkizý tizbekteri tur.
Memleket basshysynyń tapsyrmasy boıynsha Qazaqstan jasandy ıntellekt ekonomıkany, memlekettik basqarýdy, ǵylymdy, bilim men ónerkásipti damytýdyń praktıkalyq quralyna aınalatyn tsıfrlyq eldi dáıekti túrde qalyptastyrýda. Bizdiń maqsatymyz — tek jekelegen tehnologııalardy engizý emes, jańa AI-ekonomıkanyń tolyqqandy ekojúıesin qurý.
Qazaqstannyń bul júıede myqty oryn alý úshin aıtarlyqtaı áleýeti bar. Biz shıkizat jetkizýshi rólinen shyǵyp, el ishinde mańyzdy mıneraldardy qaıta óńdeýdi damytý, joǵary tehnologııalyq óndiristerdi oqshaýlaý, derekter ortalyqtaryn salý, R& D-platformalarǵa qatysý, ınjenerlik jáne AI-kadrlardy daıarlaý, sondaı-aq tehnologııalyq sheshimder eksportyn keńeıtý sııaqty tehnologııalyq qosylǵan qundy kóbirek jasaýǵa umtylamyz, — dep atap ótti Jaslan Mádıev.
AI Opportunity Partnership birlesken málimdemesi yntymaqtastyqtyń úsh negizgi baǵytyn aıqyndaıdy.
Birinshisi — jasandy ıntellektti, startaptardy, ázirleýshilerdi jáne bulttyq platformalardy damytýǵa yqpal etetin ınnovatsııalyq retteýshi ortany qoldaý.
Ekinshisi — JI salasyndaǵy, zertteýler men ázirlemeler, energetıkalyq jáne esepteý ınfraqurylymy, mańyzdy mıneraldar, kadrlar daıarlaý jáne AI-tehnologııalaryn birlesip ilgeriletý salasyndaǵy yntymaqtastyqty keńeıtý.
Úshinshisi — jeke sektordy, sonyń ishinde venchýrlik ınvestıtsııalardy, R& D-seriktestikterin, jańa býyn derekter ortalyqtaryn, esepteý resýrstaryna jáne senimdi AI-modelderge qoljetimdilikti jumyldyrý.
Sondaı-aq, bastama jetekshi álemdik ýnıversıtettermen birlesken bilim berý jáne zertteý baǵdarlamalary arqyly adamı kapıtaldy damytýǵa yqpal ete alady. Mundaı baǵdarlamalar esepteý materıaltanýyn, shıkizatty óndirý men qaıta óńdeýde JI qoldanýdy, derekter qaýipsizdigin, derekter ortalyqtarynyń ınjenerııasyn, ónerkásiptik JI men joǵary tehnologııalyq óndiristi qamtýy múmkin.
Qazaqstannyń Pax Silica-ǵa qosylýy Prezıdenttiń tsıfrlyq transformatsııa jáne jasandy ıntellekt salasyndaǵy tapsyrmalaryn iske asyrý boıynsha keń aýqymdy jumystyń bir bóligi bolyp tabylady.
