Qazaqstan ónimderi Úrimshide ótken halyqaralyq kórmede tanystyryldy
ASTANA. KAZINFORM — Qazaqstan Respýblıkasy Premer-mınıstriniń orynbasary — ulttyq ekonomıka mınıstri Serik Jumanǵarın Úrimshi qalasynda «Qytaı — Eýrazııa» IX halyqaralyq kórmesiniń ashylý saltanatyna qatysty. Bul týraly Úkimet málim etti.
«Qytaı — Eýrazııa» kórmesi dástúrli túrde Azııa men Eýropa naryqtaryn baılanystyratyn Batys Qytaı ortalyǵynyń eń iri kólik-logıstıkalyq jáne saýda haby retinde Shyńjań — Uıǵyr avtonomııalyq aýdanynyń (ShUAA) mártebesin nyǵaıtatyn, «Beldeý jáne jol» bastamasynyń negizgi halyqaralyq alańynyń biri.
Ashylý saltanatynda sóz sóılegen Qazaqstan vıtse-premeri Serik Jumanǵarın is-sharany joǵary deńgeıde uıymdastyrǵan qytaı tarapyna alǵysyn bildirdi. Ol kórmeniń saýda-ekonomıkalyq yntymaqtastyq pen iskerlik baılanysty nyǵaıtyp, jańa birlesken jobalardy iske qosýda bedeldi alańǵa aınalǵanyn atap ótti. Vıtse-premer eki memlekettiń kóshbasshylary — Qazaqstan Prezıdenti Qasym-Jomart Toqaev pen QHR Tóraǵasy Sı Tszınpınniń strategııalyq ózara is-qımyly men jeke senimi arqasynda qazaqstan-qytaı qatynasy jan-jaqty strategııalyq áriptestiktiń jańa kezeńine jetkenin atap ótti. Búginde Qytaı Qazaqstannyń eń iri saýda seriktesi bolsa, ShUAA-men shekara mańyndaǵy yntymaqtastyq ekijaqty saýdanyń negizgi draıveriniń biri.
— Qazaqstan úshin ShUAA — bul jaqyn kórshi ǵana emes, sonymen qatar Qytaıdyń mıllıondaǵan dollarlyq naryǵyna shyǵatyn negizgi kólik-logıstıkalyq torap. Shyńjań arqyly negizgi kólik arterııalary ótedi. Biz sapaly jáne ekologııalyq taza qazaqstandyq ónimderdiń: aýyl sharýashylyǵy, tamaq, metallýrgııa jáne hımııa ónimderiniń eksportyn arttyrýǵa daıynbyz, — dep atap ótti Serik Jumanǵarın.
Vıtse-premerdiń aıtýynsha, Úrimshi qalasyndaǵy EKSPO alańy bıylǵy jyly ónerkásiptik kooperatsııaǵa, ózara ınvestıtsııalar men óndiristik tizbekterdi damytýǵa qosymsha serpin beretin jańa birlesken jobalar úshin bastapqy núkte bolady. Ashylý saltanatynda QHR Memlekettik keńesi Premer-mınıstriniń orynbasary Dın Sıýesıan halyqaralyq yntymaqtastyqty odan ári nyǵaıtýdyń, mádenı almasýlardy damytýdyń jáne tehnologııalyq ınnovatsııalardy ilgeriletýdiń mańyzdylyǵyn atap ótti. Onyń aıtýynsha, Qytaı ǵylym, bilim jáne jasandy ıntellekt salasyndaǵy ózara is-qımyldy keńeıtýge, jahandyq syn-qaterdi birlesip sheshýge jáne ornyqty damýǵa járdemdesýge nıetti.
Sapar sheńberinde Qazaqstan vıtse-premeri jalpy aýdany 140 myń sharshy metrdi quraıtyn aýqymdy ekspozıtsııamen tanysty. Barlyǵy alty mamandandyrylǵan aımaq qurylǵan: ınvestıtsııalyq yntymaqtastyq, jańa sapadaǵy óndiristik kúshter, ózine tán artyqshylyqtary bar salalar, «Jasyl» damý, mádenıet pen týrızm ıntegratsııasy, sondaı-aq Jibek joly sheńberindegi yntymaqtastyq. Osy kórmeniń aýqymy men qatysý deńgeıi jańa rekordtyq kórsetkishke qol jetkizdi — oǵan 49 el men óńirdiń, halyqaralyq uıymdardyń ókilderi qatysýda. Saýda, ınvestıtsııa, tutyný jáne ınnovatsııany damytýǵa baǵyttalǵan iskerlik baǵdarlama sheńberinde 80-nen astam is-shara josparlanǵan. Olardyń qatarynda — «Qytaıǵa eksport» baǵdarlamasy sheńberinde Qazaqstannyń mamandandyrylǵan sessııasy bar.
Ortalyq oryndy «Qazaqstan» ulttyq pavılony ıelendi. Onda 30-dan astam otandyq kompanııa óz ónimin usyndy. Kórmeniń jumysy 29 maýsymǵa deıin jalǵasady. Qazaqstandyq ekspozıtsııa otandyq óndirýshilerdiń eksporttyq áleýetin aıqyn kórsetedi. Munda agroónerkásiptik keshen, tamaq jáne jeńil ónerkásip ónimderi, alkogolsiz sýsyndar, parfıýmerlik-kosmetıkalyq taýarlar jáne joǵary óńdelgen ónimder usynylǵan. Innovatsııalyq sút ónimderi, sonyń ishinde túıe untaǵy súti, sondaı-aq halyqaralyq sapa standarttaryna sáıkes keletin et jáne balyq ónimderi kelýshilerdiń nazaryn aýdarýda.
«Qytaı — Eýrazııa» halyqaralyq kórmesi (China–Eurasia Expo) 2011 jyldan bastap Úrimshi qalasynda ótkizilip keledi. Uıymdastyrýshylar — QHR Saýda mınıstrligi, QHR SІM, Qytaıdyń halyqaralyq saýdany damytýǵa járdemdesý komıteti jáne ShUAA halyq úkimeti. Qazaqstan dástúrli túrde kórmeniń basty sheteldik qatysýshysynyń biri. Eske salsaq, 2024 jyly ótken VIII «Qytaı — Eýrazııa» kórmesinde Qazaqstan shet memleketter arasynda kólemi 260 sharshy metr bolatyn eń iri ekspozıtsııany ornalastyra otyryp, qurmetti qonaq mártebesine ıe bolǵan edi.
Aıta keteıik, Qytaıdaǵy «Jazǵy Davos» dúnıejúzilik ekonomıkalyq forýmynyń 17-shi jyl saıynǵy kezdesýi aıasynda Qazaqstan Respýblıkasynyń Premer-mınıstri Oljas Bektenov ónerkásip pen tsıfrlandyrý salasynda jetekshi oryndarǵa ıe qytaılyq iri kompanııalardyń basshylarymen kezdesýler ótkizdi.
