Qazaqstan onlaın-qyzmetter ındeksi boıynsha úzdik 10 el qataryna kirdi — Qoshanov
ASTANA. KAZINFORM — Destrýktıvti kontent taratqany úshin ınternet-platformalardyń jaýapkershiligin qarastyrǵan jón. Bul týraly Májilis tóraǵasy Erlan Qoshanov málim etti.
— Keshe Úkimettiń keńeıtilgen otyrysynda Memleket basshysy Qasym-Jomart Kemeluly Toqaev ótken jyldyń áleýmettik-ekonomıkalyq damý nátıjelerin qorytyndylap, jańa mindetter qoıdy. Prezıdent ekonomıkalyq damýdyń birqatar kórsetkishi boıynsha oń serpin bar ekenin atap ótip, aldaǵy bes jylǵa arnalǵan jumystyń basty baǵyttaryn aıqyndap berdi. Ol — iri ınfraqurylymdyq jobalar, tsıfrlandyrý men jasandy ıntellekt, atom energetıkasyn damytý, agroónerkásiptik keshendi nyǵaıtý, ınvestıtsııa tartý. Árıne, bul mindetterdi oryndaý úshin zaman talabyna beıimdelgen berik zańnamalyq negiz qajet. Memleket basshysy Parlamentke jer qoınaýyn paıdalaný quqyqtaryn bólý kezinde ınvestorlarǵa túsinikti ári ashyq quqyqtyq baza qurý týraly tapsyrma berdi. Qazirgi ýaqytta depýtattardyń bastamasymen ázirlengen jer qoınaýyn paıdalaný týraly zań jobasy qaralyp jatyr. Endi bastamashy depýtattar elimizge iri geologııalyq barlaý kompanııalary kelýine neǵurlym qolaıly jaǵdaı jasaý máselesine muqııat nazar aýdarýy qajet, — dedi E. Qoshanov Májilistiń jalpy otyrysynda.
Sonymen qatar ol Memleket basshysy nazar aýdarǵan taǵy bir mańyzdy másele tsıfrlandyrý salasyna qatysty ekenin eske saldy. Birikken Ulttar Uıymy bergen baǵa boıynsha Qazaqstan búgingi tańda osy salada eleýli jetistikke jetip otyr. Elimiz 193 memleket arasynda 24-shi orynda. Sondaı-aq onlaın-qyzmetter ındeksi boıynsha úzdik 10 el qataryna kirdi. Máselen, ınternet arqyly memlekettik qyzmetterge qol jetkizý deńgeıi 92 paıyzǵa jetti.
— Alaıda mundaı progrestiń ekinshi jaǵy da bar. Tsıfrlandyrýmen birge halyqqa jalǵan aqparat taratý beleń alyp, alaıaqtyqtyń nebir túri qarqyndy damyp kele jatyr. Qazaqstandyqtar kún saıyn osyndaı jaǵymsyz jaıttarǵa tap bolýda. Birneshe depýtattyq saýaldyń osy problemaǵa arnalǵany beker emes. Qazirgi jaǵdaıda bul máselege jan-jaqty qaraý kerek. Eń aldymen, zań men tártipti saqtaýǵa baǵyttalǵan sharalar qabyldaý qajet. Máselen, alda qaralatyn Tsıfrlyq kodeks jobasy aıasynda elimizdiń turaqtylyǵyna nuqsan keltiretin jalǵan aqparattyń taralýyna zańnamalyq turǵydan tosqaýyl qoıýǵa tıispiz. Sonymen qatar, destrýktıvti kontent taratqany úshin ınternet-platformalardyń jaýapkershiligin qarastyrǵan jón, — dedi Májilis tóraǵasy.
Onyń sózine qaraǵanda, jasandy ıntellektini engizý jónindegi jumysty jalǵastyrý kerek. Májilis qabyrǵasynda tıisti zań jobasy ázirlendi.
Jaqyn arada osy zań jobasyn talqylaý jumysy bastalady. Ol úshin eń aldymen, naryqtaǵy barlyq taraptyń pikirin eskerip, búgingi kúnniń talabyna saı keletin, shyn máninde jumys isteıtin zań qabyldaýymyz qajet.
Eske salsaq, 28 qańtarda Prezıdent Qasym-Jomart Toqaevtyń qatysýymen Úkimettiń keńeıtilgen otyrysy ótti.