Qazaqstan óńirlik sý-energetıkalyq konsortsıým qurýdy usynady – Murat Nurtileý

ASTANA. QazAqparat – Qazaqstan tapshylyq máselesin sheshý úshin óńirlik sý-energetıkalyq konsortsıým qurýdy usynady. Bul týraly elordada ótip jatqan Azııadaǵy qaýipsizdik jáne yntymaqtastyq forýmynda sóz sóılegen Syrtqy ister mınıstri Murat Nurtileý málim etti, dep habarlaıdy QazAqparat tilshisi.

«Men Ortalyq Azııanyń bolashaq damýy úshin muqııat nazar aýdarýdy qajet etetin birneshe naqty máseleni atap ótkim keledi. Olar - sý tapshylyǵy, qorshaǵan orta, shekara daýy jáne Aýǵanstandaǵy jaǵdaı. Halyqtyń ósýi men sý resýrstarynyń jetispeýshiligi kezinde sý resýrstaryn ádil jáne utymdy bólý basty máselege aınaldy. Osy sebepti Qazaqstan óńirlik sý-energetıkalyq konsortsıým qurýdy usynady. Sonymen qatar bizdiń elimiz 1990-shy jyldardyń basynda Ortalyq Azııadaǵy seriktesterimizben birge qurǵan Halyqaralyq Araldy qutqarý qorlary arqyly Araldy qalpyna keltirýmen aınalysyp keledi», - dep atap ótti mınıstr.

Sonymen qatar Murat Nurtileý Qazaqstan transshekaralyq ózenderge qatysty ózekti máselelerdi sheshý boıynsha Reseı, Qytaı, Aýǵanstan sııaqty memlekettermen birlesip jumys istep jatqanyn atap ótti.

«Ortalyq Azııadaǵy qaýipsizdikti qamtamasyz etý degenimiz Aýǵanstanda beıbitshilik pen turaqtylyq ornatýdy meńzeıdi. Bizdiń paıymymyzǵa saı, Aýǵanstan BUU-nyń úılestirýi halyqaralyq qoldaýdy qajet etedi. Aýǵanstanda beıbitshilik ornatý tek Ortalyq Azııaǵa ǵana emes, sonymen qatar jalpy Azııa men Eýropadaǵy turaqtylyqqa tikeleı áser etedi. Osy maqsatta Qazaqstan Almatyda Ortalyq Azııa men Aýǵanstandy turaqty damytý jónindegi BUU habyn qurýdy usynamyz», - dep túıindedi Murat Nurtileý.

Eske salaıyq, buǵan deıin elordada Azııadaǵy qaýipsizdik jáne yntymaqtastyq forýmy ótip jatqanyn habarlap edik. Oǵan Azııa elderinen kelgen 60-tan astam sarapshy qatysyp jatyr.

https://kaz.inform.kz/news/elordada-aziyadagy-kauipsizdik-zhane-yntymaktastyk-forumy-bastaldy_a4089200