Qazaqstan óńirleriniń taýar óndirýshileri elorda turǵyndaryna 200-den astam ónim usynady
NUR-SULTAN. QazAqparat - Nur-Sultan men óńirlerdiń 200-den astam taýar óndirýshileri demalys kúnderi elordada ótetin jármeńkelerde óz ónimderin usynady, dep habarlaıdy QazAqparat.
Elordada aýyl sharýashylyq jármeńkeler maýsymy jalǵasýda. Osy jáne kelesi demalys kúnderi, ıaǵnı 6-7 jáne 13-14 qarashada «Han Shatyr» SOO janyndaǵy alańda birneshe óńirdiń jáne Nur-Sultan qalasynyń taýar óndirýshileri óz ónimderin usynady, dep habarlady qala ákimdiginiń resmı saıty.
6-7 jáne 13-14 qarashada «Han Shatyr» SOO janyndaǵy alańda Qaraǵandy, Aqmola, Pavlodar oblystary taýar óndirýshileriniń jáne Nur-Sultan qalasy kásipkerleriniń qatysýymen aýyl sharýashylyǵy jármeńkeleri ótedi.
Qala turǵyndary men qonaqtary dástúrli túrde naryqtyq baǵadan 10-15% tómen taýarlardy satyp ala alady.
Sórelerde ónimderdiń keń assortımenti usynylady, sonyń ishinde: sıyr eti, jylqy eti men qoı eti, qus eti, sút jáne qyshqyl sút ónimderi, kókónister (kartop, pııaz, sábiz, qyryqqabat), jemister, taýyq jumyrtqasy, balyq, jarma, un jáne t. b. bar.
Eki jármeńkege 200-den astam taýar óndirýshiler men kásipkerler qatysady.
Aıta ketý kerek, elordada jármeńkelerdi ótkizý áleýmettik mańyzy bar azyq-túlik ónimderiniń baǵasyn turaqtandyrý quraldarynyń biri bolyp tabylady. 21 tamyzdan bastap Nur-Sultandaǵy 14 jármeńkege Qazaqstannyń barlyq óńirlerinen 860-tan astam taýar óndirýshi qatysty. Olar barlyǵy 4,8 myń tonnadan astam azyq-túlik satty.
«Bıyl qala basshylyǵynyń sheshimimen ár jármeńkege taýar óndirýshiler men Nur-Sultan bazarlarynyń kóterme satýshylary qatysady. Ár jármeńkege elordanyń 100-120 óndirýshisi qatysady»,-dedi Nur-Sultan qalasynyń Investıtsııalar jáne kásipkerlikti damytý basqarmasynyń saýda jáne qyzmet kórsetý salasyn damytý bóliminiń basshysy Rýslan Ydyrysov.
Onyń aıtýynsha, aýa-raıy jaǵdaıy jármeńkege qatysýǵa áser etpeıdi, qala turǵyndary azyq-túlikti artyǵymen satyp alýda. Atap ótkendeı, óńirlerdiń jármeńkelerine elorda halqynyń úshten biri qatysady.
«Jármeńkeler - bul eń aldymen arzan ári sapaly ónimder, elorda turǵyndaryna qoljetimdi baǵamen satyp alý múmkindigi. Jármeńkeler kezinde jaqyn dúkenderdegi kelýshiler trafıgi tómendeıdi, muny taldaý nátıjesi kórsetti. Jármeńkeler-qaladaǵy baǵany ustap turýǵa yqpal etetin quraldardyń biri», - dep atap ótti elorda ákimdiginiń ókili.
