Qazaqstan óńirleriniń Qytaımen saýda-sattyq deńgeıi tómendeýde
ASTANA. QazAqparat - Qytaımen saýda-sattyqta Qazaqstannyń óńirlik negizgi eksporttaýshylary Aqtóbe, Qaraǵandy jáne Qyzylorda oblystarynyń kórsetkishteri 23 paıyzǵa quldyrady, dep jazady energyprom.kz.
Qytaı Qazaqstannyń basty seriktesteriniń biri sanalady. QR Prezıdenti 2017 jyldyń 31 qańtaryndaǵy Qazaqstan halqyna Joldaýynda elimizdiń aýmaǵynda Qytaımen birlesken 6 joba júzege asyryla bastaǵandyǵyn, al 2 joba iske qosylǵanyn atap ótken. Sonyń biri - gıbrıdtik jáne tolyqtaı elektrli JAC avtomobılderin iri qurylǵylardan qurastyratyn zaýyt. Degenmen, sońǵy málimetter Qazaqstan men QHR arasyndaǵy saýda belsendiliginiń respýblıkalyq, sonymen birge óńirlik deńgeıde de baıaýlaǵandyǵyn kórsetip otyr.
«2016 jyly Qytaımen saýda-sattyqta óńirlik negizgi eksporttaýshylar sanalǵan Aqtóbe, Qaraǵandy jáne Qyzylorda oblystarynyń QHR-ǵa eksportynyń kólemi 23 paıyzǵa qysqardy. Aqtóbe oblysynyń Qytaıǵa eksport kólemi 36 paıyzǵa, Qyzylorda oblysy 47 paıyzǵa kemidi. Qaraǵandy oblysynyń eksporty birshama turaqty (jylyna -5 paıyz) bolyp tur», - delingen habarlamada.
Qazaqstannyń qytaıǵa eksportynyń jalpy kólemindegi bul úsh óńirdiń jıyntyq úlesi 60 paıyzǵa jýyqtaıdy. Aqtóbe oblysynan Qytaıǵa shıki munaı, ken jáne mys kondentsatynyń eksport kólemi azaıǵan. Ótken jyly bul oblys kórshi elge jalpy somasy 156,8 mln. dollardy quraıtyn 548 myń tonna shıki munaı men shıki munaı ónimderin jetkizgen. Aqshalaı mánde 1 jyl ishine eksport somasy 22 paıyzǵa kemigen. Al ken men mys kondentsaty eksporty 2015 jylmen salystyrǵanda 53 paıyzǵa azaıyp, 77,7 mln. dollardy quraǵan.
2016 jyly Qaraǵandy oblysy Qytaıǵa 725,5 mln. dollardyń mys jáne mys qorytpalaryn satty. Bul soma 2015 jylmen salystyrǵanda 5 paıyzǵa az. Qyzylorda oblysynan kórshi elge ótken jyly jalpy quny 500,8 mln. dollardy quraıtyn 2,3 mln. tonna shıki munaı eksporttalǵan. Al aqshalaı mánde eksport bir jyldyń ishinde 2 esege quldyraǵan.
Qazaqstanda Qytaı ónimderin satyp alýda Almaty kósh bastap tur. Kórshi elden Qazaqstanǵa jetkiziletin ımporttyń 47 paıyzy Almatyǵa tıesili. 2016 jyly Almaty men QHR arasyndaǵy taýar aınalymy 1,9 mlrd. dollardy qurady. Bul 2015 jylǵy deńgeıden 28 paıyzǵa tómen. Qytaıdan Qazaqstanǵa negizinen telefon apparattary, onyń ishinde uıaly telefondar jetkiziledi. Ótken jyly jalpy quny 290,1 mln dollardy quraıtyn shamamen 2 myń tonna qurylǵy jetkizildi. Ekinshi orynda kompıýterler men basqa da esepteý tehnıkalary tur. Bul tehnıkalar ótken jyly kórshi elden 122,5 mln. dollarǵa satyp alynǵan.
