Qazaqstan óńirlerinde jekemenshik bes turǵyn úıde órt boldy, 7 adam ajal qushty
ASTANA. 4 qańtar. QazAqparat - 2-3 qańtar kúnderi Qazaqstan óńirlerinde jekemenshik bes turǵyn úı órtenip ketti, 7 adam, sonyń ishinde 2 sábı ajal qushty, dep habarlandy QR TJM-nan.
Atap aıtqanda, 2 jeltoqsan kúni saǵat 22.00-de Jambyl oblysy Moıynqum aýdanynda ornalasqan jekemenshik úı órtendi. Órt sóndirý qyzmeti shaqyrylmady. Oqıǵa ornynda 6 jáne 3 jastardaǵy eki balanyń máıitteri tabyldy.
Keshe saǵat 08.54-te Petropavl qalasyndaǵy jer úıde shyqqan órt eki saǵattan keıin sóndirildi. Tilsiz jaýdy aýyzdyqtaýǵa Soltústik Qazaqstan oblysy boıynsha TJD órtke qarsy qyzmetiniń 8 adamy men 2 tehnıkasy jumyldyryldy. Onymen kúres kezinde 30 jastaǵy er adamnyń máıiti tabyldy.
SQO Shal aqyn aýdanynyń Sergeevka qalasynda keshe saǵat 11.24-te turǵyn úı órtene bastady. SQO boıynsha TJD órtke qarsy qyzmetiniń (4 adam men 1 tehnıka) kúshimen jalyn eki jarym saǵattan keıin aýyzdyqtaldy. Órt ornynda 53 jastaǵy áıel men týǵan jyly anyqtalmaǵan er adamnyń deneleri tabyldy.
Sondaı-aq 3 qańtar kúni saǵat 07.59-da Shymkent qalasynda jekemenshik turǵyn úı otqa orandy. Órt sóndirýshiler shaqyrylǵan joq. Jalynmen kúres barysynda 39 jastaǵy er adamnyń múrdesi tabyldy, sondaı-aq 40-45 jas shamasyndaǵy bir áıel aýrýhanaǵa jetkizildi, jeke tulǵasy ázirge anyqtalǵan joq.
Keshe saǵat 18.16-da Ońtústik Qazaqstan oblysynyń Saıram aýdanyndaǵy turǵyn úıde bastalǵan órt eki saǵattan keıin sóndirildi. Oqıǵa bolǵan jerde 40 jastaǵy er adamnyń máıiti tabyldy.
