Qazaqstan óńirlerinde tennısten halyqaralyq týrnırler ótedi

ASTANA. QazAqparat - Qazaqstan tennıs federatsııasy elimizdiń aımaqtarynda halyqaralyq týrnırler ótkizbek. Bul týraly búgin Astanada 2014 jyldyń qorytyndysy jáne 2015 jylǵy maqsat-mindetterge arnalǵan esepti konferentsııadan keıingi brıfıngte atalǵan federatsııanyń atqarýshy dırektory Dıas Dosqarev málim etti.

Búginde federatsııa 45 halyqaralyq, 48 respýblıkalyq jáne 98 jasóspirimder týrnırlerin ótkizdi.

«Biz Azııa tennıs federatsııasy men Halyqaralyq tennıs federatsııasy aıasynda kásibı deńgeıdegi, sondaı-aq jasóspirimder týrnırlerin ótkizýdi jalǵastyramyz. Osy sporttyq jarystardy ótkizýdiń aýqymyn keńeıtpekpiz jáne osy sharalarǵa óńirlerdi qamtıtyn bolamyz. Halyqaralyq týrnırler osyǵan deıin Óskemen men Aqtóbede ótkenin bilesizder»,-dedi atqarýshy dırektor.

Budan bólek D. Dosqaraev QTF tarapy bapkerlerdiń biliktiligin arttyrý boıynsha jumystardy jalǵastyratyndyǵyn atap ótti. Bul baǵytta arnaıy baǵdarlamalar men semınarlar uıymdastyrylmaq.