Qazaqstan óńirleri tsıfrlyq teleradıo habarlaryn taratýǵa qashan qosylady
«Tsıfrlyq teleradıo habarlaryn taratýdy engizý jobasy sonaý 2010 jyly tsıfrlyq spýtnıktik taratýdy engizýmen bastalǵan edi. Eger 2010 jyly «Otaý TV» brendinde ne bári 6300 abonent bolsa, 2018 jyly bul kórsetkish 1,4 mln abonentke jetip otyr. Kelesi kezeń halyqty barynsha joǵary sapaly beınelermen jáne dybyspen qamtamasyz etýge baǵyttalǵan tsıfrlyq efırlik teleradıo habarlaryn taratýdy engizý sanalady. Qazaqstandyqtar oblys ortalyqtary deńgeıinde 30 telearnaǵa deıin, óńirlik deńgeıde 15 arnaǵa deıin kórýine múmkindik bar», - dedi QR Aqparat jáne kommýnıkatsııalar mınıstrligi BAQ salasyndaǵy memlekettik saıasat departamentiniń dırektory Bekzat Rahımov aqparat, AKT jáne memlekettik qyzmetter kórsetý salalaryn damytý máseleleri jónindegi qoǵamdyq keńes músheleri aldynda sóılegen sózinde.
Onyń aıtýynsha, qazirgi ýaqytta mınıstrlik Mańǵystaý, Jambyl, Túrkistan oblystary men Shymkent qalasyn tsıfrlyq efırlik teleradıo habarlaryn taratýǵa kóshirýdiń birinshi kezeńin júzege asyrý jumystaryn aıaqtady.
«2019 jyldyń 1 shildesine deıin Almaty, Pavlodar, Qostanaı oblystary, 2020 jyldyń 1 shildesinen bastap Atyraý, Qyzylorda oblystary tsıfrlyq teleradıo habarlaryn taratýǵa kóshetindigi josparlanyp otyr. Sońǵy kezeńde, 2021 jyly Batys Qazaqstan, Aqmola, Aqtóbe oblystary men Astana jáne Almaty qalalary kóshedi. Barlyq ákimdikterge tıisti aqparattar berilgen. Daıyndyq jumystary júrgizilip jatyr», - dedi departament dırektory.
Onyń aıtýynsha, 22 qazanda Mańǵystaý oblysy tsıfrlyq habarlar taratýǵa kóshti. Bul óńirde ınfraqurylymdar tolyqtaı daıyndalyp, 21 radıotelevızııalyq stansa salyndy. Onymen 600 myń adam turatyn 48 eldi meken qamtyldy. Sonymen qatar, 26 qarasha Jambyl oblysy, 27 qarashada Túrkistan oblysty tsıfrlyq habarlar taratýǵa ótti.