Qazaqstan ónimderi Grýzııa naryǵyna shyqty

ASTANA. QazAqparat - «KAZAKH INVEST» Ulttyq kompanııasy Tbılısıde  qazaqstandyq 19 óndirýshiniń ónimderimen tanystyrý maqsatynda bıznes-forým ótkizdi. Forýmnyń nátıjesinde birqatar eksporttyq kelisimsharttarǵa qol qoıý josparlanýda, dep habarlaıdy QazAqparat.

«Grýzııaǵa qazaqstandyq balmuzdaqty jetkizý týraly kelisimge qol jetkizildi. Bastapqy kólemi - aıyna 4 júk kóligi. Bul otandyq óndirýshige jaqsy kepildi tapsyrys bolyp tabylmaq. Sonymen qatar, grýzııalyq sýpermarketterge bıoqaptar jetkizilmek. Kelesi jyldan bastap, Grýzııada polıetılendi qaptardy óndirýge jáne ımporttaýǵa tyıym salynady, sondyqtan bizdiń óndirýshiler usynǵan ónim saýda jelileri tarapynan úlken qyzyǵýshylyq týdyrýda. Aıyna eń tómengi jetkizý kólemi - 500 myń birlik», - dep málim etti «KAZAKH INVEST» UK» AQ basqarma tóraǵasy Maqsat Qabashev.

Ashylyp jatqan eksporttyq múmkindikter otandyq taýar óndirýshilerge eýropalyq áriptestermen yntymaqtastyqty josparlaýǵa múmkindik beredi. Ónimderdi  keıinnen EO elderinde júzege asyrý úshin olardy sertıfıkattaý boıynsha jumystar bastaldy.

«Bizdiń óndirýshiler eýropalyq naryqqa shyǵý úshin, sertıfıkattaýdyń barlyq kezeńderin ótýge daıyn. Qazaqstandyq ónimder Grýzııada júzege asyryla bastady jáne bolashaqta eksporttyq múmkindikterdiń keńeıetini qazirdiń ózinde aıqyn. Eksporttyq qoldaý - «KAZAKH INVEST» kompanııasy jumysynyń baǵyttarynyń biri. Bizdiń basty maqsatymyz -eksportqa baǵyttalǵan óndiristerdi qurý úshin, Qazaqstanǵa sheteldik ınvestıtsııalardy tartý», - dedi Maqsat Qabashev.