Qazaqstan ónertapqyshtary balanyń qaýipsizdigine arnalǵan erekshe qurylǵyny jasap shyǵardy
ASTANA. QazAqparat - Qazaqstan ónertapqyshtary ata-analar úshin erekshe kómekshini oılap tapty. Bul týraly «QazAqparat» tilshisine bergen suhbatynda «Mongoose» kompanııasynyń menedjeri Irına Imanasova málim etti.
«Bul qurylǵy shaǵyn ǵana jáne salmaǵy da jeńil. Ony balanyń kıimine esh qıyndyqsyz bekitýge bolady. Qurylǵy telefonǵa mobıldik qosymsha arqyly qosylyp, keıinnen balanyń júrgen jeri telefonda kórinip turady. Naryqtaǵy «gps trekerlerden» aıyrmashylyǵyna toqtalatyn bolsaq, bizdiń qurylǵy balanyń júrgen jerin dalada ǵana emes, sonymen qatar jertólede, saýda ortalyqtarynda, jalpy barsha álemde esh kedergisiz anyqtaı alady. Osy qurylǵyǵa aldyn ala tólengen roýmıng engizilgen, sondyqtan álemniń kez kelgen núktesinen balanyń turǵan jerin kóre alasyzdar»,-dedi I. Imanasova.
Onyń sózine qaraǵanda, «Mangýst» qurylǵysy akkýmýlıatorynyń qýaty 20 kúnge deıin jetedi.
«Onyń taǵy bir ereksheligi - qurylǵy sý ótkizbeıdi jáne ońaılyqpen syna qoımaıdy. «Mangýst» balanyń turǵan jerin anyqtaýdan bólek, onyń kúndelikti júris-turysyn, ádetin este saqtaıdy, bala qaı jerde qashan bolatynyn júıege engizedi. Eger de daǵdyly kúntártipten aýytqýlar bolsa, ıaǵnı mektepten shyǵatyn ýaqyttan erterek merzimde balany bireý kólikpen saǵatyna 100 shaqyrym jyldamdyqpen alyp ketse, onda ata-anasynyń mobıldik qosymshasyna arnaıy eskertý keledi»,-dedi kompanııa menedjeri.
Belgili bolǵandaı, Qazaqstanda shyǵarylatyn bul qurylǵylar jappaı satylymǵa aldaǵy jyldyń basynda shyǵarylady dep kútilýde.
