Qazaqstan ónerpazdarynyń qatysýymen Máskeýde shyǵarmashylyq kesh ótti

MÁSKEÝ. QazAqparat – Máskeýdiń ulttar úıi sahnasynda Qazaqstan men Reseıdiń mádenı áriptestigine arnalǵan «Dostyq áýeni» shyǵarmashylyq keshi ótti, dep habarlaıdy QazAqparat menshikti tilshisi.

Jas opera ánshisi, Gnesınalar atyndaǵy Reseı mýzyka akademııasynyń túlegi, halyqaralyq baıqaýlar laýreaty Aıgerim Temirbaeva mýzykalyq keshtiń basty keıipkeri retinde óner kórsetti. Ol qazaq, orys jáne ıtalııan tilindegi klassıkalyq shyǵarmalardy, ıaǵnı tyńdarmanǵa jaqsy tanymal ataqty operalar partııalaryn, sondaı-aq lırıkalyq jáne estaradalyq ánder oryndady.

Kontsert uıymdastyrýshysy, Máskeý ulttar úıi mádenı-aǵartý jumystary jáne aımaqaralyq mádenı áriptestik jónindegi bóliminiń shyǵarmashylyq janrlary boıynsha mamany Gúlnar Isakova atap ótkendeı, sharanyń maqsaty – Qazaqstan men Reseı halqynyń dostyq baılanysyn nyǵaıtý.

«Baǵdarlamanyń mazmuny qazaq, orys jáne ıtalııandyq mýzyka mádenıetimen jáne oryndaýshylardyń shyǵarmashylyq talantymen jaqynyraq tanysýǵa múmkindik beredi. Bul – barshaǵa qýanysh pen ádemilik, sondaı-aq merekelik kóńil kúı jáne Aıgerim Temirbaeva men onyń áriptesteriniń shyǵarmashylyǵyn tamashalaý múmkindigin syılaıtyn kesh», - dedi ol.

Sonymen birge, arnaıy shaqyrylǵan Gnesınalar atyndaǵy RMA kontsertmeısteri, halyqaralyq baıqaýlar laýreaty Elena Mınko, Gnesınalar atyndaǵy RMA shákirti, halyqaralyq baıqaýlar laýreaty Dıana Shaıymqulova da óner kórsetip, álemdik klassıkanyń shedevrlerin oryndady.