Qazaqstan ónerkásiptiń jańa baǵyttaryn damytýǵa basymdyq beredi – Bektenov
ASTANA. KAZINFORM – QR Premer-mınıstri Oljas Bektenov Ekaterınbýrg qalasynda ótken XVI «INNOPROM» halyqaralyq ónerkásip kórmesiniń «Indýstrııa 360: shekarasyz óndiris» atty plenarlyq sessııasyna qatysty, dep habarlaıdy Úkimettiń baspasóz qyzmeti.
Іs-sharaǵa Reseı Úkimetiniń Tóraǵasy Mıhaıl Mıshýstın, Armenııa premer-mınıstri Nıkol Pashınıan, Belarýs Premer-mınıstri Aleksandr Týrchın, Qyrǵyzstan Premer-mınıstri Adylbek Qasymalıev, sondaı-aq Indonezııa, Iran, Túrikmenstan, Mıanma, Seıshel araldary, Tájikstan, Ózbekstan, BAÁ, Vetnam jáne Venesýela úkimetteriniń ókilderi qatysty.
Premer-mınıstr óz sózinde Qazaqstan Prezıdent Qasym-Jomart Toqaevtyń basshylyǵymen ozyq damýdyń jańa kezeńine qadam basqanyn atap ótti.
«Jalpyulttyq referendýmda qabyldanǵan Konstıtýtsııa aýqymdy saıası jáne ınstıtýtsıonaldyq reformalardy nyǵaıta tústi. Biz barlyq eldermen ashyqtyq pen syndarly áriptestikke negizdelgen Ádiletti ári Ozyq Qazaqstandy damytý baǵytyn dáıekti túrde jalǵastyryp kelemiz. Adamı kapıtaldy, ǵylym men ınnovatsııany damytý — memleket qyzmetiniń negizgi qaǵıdattary. Mundaı tásil ınvestorlardyń senimin nyǵaıtýǵa, ekonomıkany jańǵyrtýǵa jáne halyqaralyq yntymaqtastyqty keńeıtýge qolaıly jaǵdaı jasaıdy», – dedi Oljas Bektenov.
Qazaqstan shıkizatty tereń óńdeý, zamanaýı materıaldar jasaý jáne ǵylymdy kóp qajet etetin óndiristerdi damytý baǵytyndaǵy birlesken jobalardy iske asyrýǵa múddeli.
Investorlarǵa memlekettik qoldaý sharalary, salyqtyq jáne kedendik jeńildikter, Altyn Visa arnaıy vızalyq rejımi jáne «bir tereze» qaǵıdaty boıynsha jobalardy súıemeldeý múmkindigi usynylady. Basym baǵyttar qatarynda mashına jasaý, metallýrgııa, munaı-gaz hımııasy, hımııa ónerkásibi, zamanaýı qurylys materıaldary men joǵary qosylǵan quny bar ónimder óndirisi bar.
Sondaı-aq ónerkásipti tsıfrlyq transformatsııalaý máselesine erekshe nazar aýdaryldy. Qazaqstan óndiris salasyna derekterdi taldaýdyń ıntellektýaldy júıelerin, bultty platformalardy jáne jańa býyn baǵdarlamalyq sheshimderin engizip keledi.
Óńdeý ónerkásibinde tsıfrlyq quraldardy qoldanatyn kásiporyndardyń úlesi 2022 jylǵy 13%-dan 2025 jyly 21%-ǵa deıin artty. Al ónerkásiptik ınternet zattaryn paıdalanatyn óndirister sany 7 myńǵa jetti.
Kórme aıasynda delegatsııa basshylary mashına jasaý, metallýrgııa, ónerkásiptik jabdyqtar, ınnovatsııalyq óndiris jáne zamanaýı tehnologııalar salasyndaǵy ázirlemelermen tanysty.
Qazaqstandyq pavılonda Qarmet, Qazaqmys, Alageum Electric, KamLitKZ, Tengry Tyres, Orda Glass, Silk Road Electronics, BTS ERG jáne basqa da otandyq kompanııalardyń jobalary usynyldy.
Sonymen qatar ónerkásiptik jasandy ıntellekt, mıkroelektronıka jáne tehnologııalyq bilim berý baǵytyndaǵy sheshimder tanystyryldy.
Aıta keteıik, Qazaqstanda quny 100 mln eýrodan asatyn sýtegi óndirý jobasy salynady.
