Qazaqstan ónerkásibin tsıfrlandyrý: bos qalǵan jumysshylar qaıda barady
«QR Investıtsııalar jáne damý mınıstrligi Fraýngofer atyndaǵy Eýropadaǵy iri qoldanbaly zertteýler ınstıtýtynyń sarapshylary jáne Shvetsııa taý-ken klasteri men Nokıa kompanııasynyń mamandarymen birlesip, óńdeý ónerkásibi mentaý-mettallýrgııalyq keshen salalaryndaǵy 600-den astam kásiporynǵa zertteý júrgizdi», - dedi QR Investıtsııalar jáne damý mınıstrliginiń birinshi vıtse-mınıstri Alık Aıdarbaev Úkimet úıinde ótken baspasóz máslıhatynda.
Kásiporyndardyń daıyndyǵyn anyqtaý Fraýngofer ınstıtýtynyń mamandary ázirlegen ádistememen júrgizildi. Bul ádisteme kásiporynnyń tehnologııalyq jaǵyn ǵana emes, óndiristi uıymdastyrý, menedjment jáne startegııasyn jáne qyzmetkerler men kommýnıkatsııanyń ázirligin de baǵalaýǵa múmkindik beredi.
«Zertteý nátıjelerine sáıkes, óńdeý ónerkásibinde kásiporyndardyń shamamen 20%-yna ǵana Indýstrııa 4.0 tehnologııalaryn engizýge jetkilikti tehnologııalyq, uıymdastyrýshylyq jáne kadrlyq bazanyń bar ekeni anyqtaldy. Taý-ken salasyndaǵy jaǵdaı anaǵurlym jaqsyraq. Mundaǵy kórsetkish 40%-dy qurady», - dep óz sózin tolyqtyrdy A.Aıdarbaev.
Sondaı-aq, avtonomdy robottandyrylǵan júıeler, 3D baspa sekildi tsıfrlyq tehnologııalarǵa kóshken soń, qol eńbeginiń qajeti bolmaı qalýy múmkin. Osyǵan oraı, jýrnalıster vıtse-mınıstrge qysqartýǵa túsetin jumysshylar taǵdyry jóninde suraq qoıdy.
«Bir saryndy aýyr jumystardy avtomattandyrsaq ta, odan bosaǵan adamdar sol kásiporynda qala beredi. Olardyń biliktilikterin arttyryp, jańa jumys oryndaryn qurý qajet. Eger qandaı da bir kásiporynda jumys oryndarynyń qysqaratyny belgili bolsa, aldyn ala shara qabyldaımyz. Bul úshin túrli jol kartalary ázirlenip jatyr. Sondyqtan, ýaıymdaýdyń qajeti joq», - dep jaýap berdi ol jýrnalıster suraǵyna.
QR IDM keltirgen derekterge sáıkes, qazirgi ýaqytta ERG, Qazaqmys, ArselorMıttal syndy iri kompanııalar kásiporyndy tsıfrlandyrý boıynsha birqatar elementterdi engizip úlgerdi.