Qazaqstan óndirýshileri Túrikmenstannyń halyqaralyq tenderlerine qatysa alady
Bul jaıynda «Kazahstanskaıa pravda» gazetine suhbat bergen Qazaqstannyń Túrikmenstandaǵy Tótenshe jáne Ókiletti Elshisi Orman Nurbaev málim etti, dep habarlaıdy QazAqparat.
«Kómirsýtek shıkizatynyń iri qoryna ıelik etip otyrǵanymen - eki eldiń de teńizge tikeleı shyǵar joly joq. Mundaı jaǵdaıda birlesken úılestirilgen is-qımyl ǵana bizdiń kómirsýtegimizdiń halyqaralyq arenaǵa shyǵýyn qamtamasyz ete alatyndyǵy sózsiz. Eki eldiń mol resýrs qory men úlken tranzıttik-kóliktik áleýeti bar ekendigin eskersek , onda otyn-energetıkalyq saladaǵy yntymaqtastyq bizdiń ózara is-qımyldarymyzdyń strategııalyq baǵyttarynyń biri bola alady. Bul saladaǵy ózara is-qımyl uzaq merzimdi sıpatqa ıe jáne únemi izdenis pen kóp jumysty talap etedi», - dedi Elshi suhbat barysynda.
Máselen, onyń atap ótýinshe, búginde Ashhabadtyń Túrikmenstan-Aýǵanstan-Pákistan-Úndistan gaz qubyryn salýǵa qatysty óte aýqymdy jospary bar. Bul rette, qazaqstandyq óndirýshiler arqalyq rels, qubyr, jalpy Túrkimenstan ekonomıkasynyń munaıgaz sektorynyń ınfraqurylymyna qajetti barlyq taýarlar men qyzmet túrlerin jetkizýge arnalǵan halyqaralyq tenderlerge qatysa alar edi.
«Qazaqstandyq-túrkimenstandyq yntymaqtastyqtyń kelesi bir strategııalyq baǵyty tranzıttik-kóliktik sala sanalady. Oǵan eki eldiń geografııalyq ornalasýy mol múmkinshilik beredi. Qazirgi ýaqytta júzege asyrylǵan «Soltústik-Ońtústik» temirjoly jobasynan bólek ilespe ınfraqurylymy bar qoldanystaǵy túrkimen temirjoldary men avtomobıl joldaryn jańǵyrtý jáne jańasyn salýǵa baǵyttalǵan jobalary da nazar aýdarýǵa turarlyq», - dedi Nurbaev.
Aıta keteıik, keshe elimizge Túrikmenstan Prezıdenti Gýrbangýly Berdimuhamedov memlekettik saparmen kelip , Aqordada Elbasy Nursultan Nazarbaevpen shaǵyn jáne keńeıtilgen quramda kelissózder ótti. Nátıjesinde birqatar ekijaqty qujattarǵa qol qoıyldy.
Al búgin elordada Túrikmenstan prezıdenti Gýrbangýly Berdimuxamedovtiń jylqy men at ósirý ónerine arnalǵan qazaq tilindegi úsh kitabynyń tanystyrylymy ótti.
