Qazaqstan óndirisiniń qaı salalarynda jalaqy joǵary

ASTANA. QazAqparat - Qazaqstandyq óndiris salasynda munaı-gaz jáne temeki ındýstrııasynyń jumysshylary eń joǵary jalaqyny alady, dep habarlaıdy QazAqparat Energyprom.kz monıtorıng agenttigine silteme jasap. 

Agenttik keltirgen derekterge sáıkes, olardyń ortasha aılyq jalaqysy 700 myń teńgeden asady. Atap aıtqanda, munaı-gaz salasynda eńbekaqy - 716,1 myń teńge bolsa, temeki ónimderin shyǵaratyn kompanııa qyzmetkerleri - 708,1 myń teńge alady.

Sondaı-aq, taý-ken óndirisinde tehnıkalyq qyzmet kórsetýshi mamandar da edáýir kóbirek (418,7 myń teńge) eńbekaqy alady. Taý-ken óndirý jáne karerlerdi qazý salasynda jumysshylardyń ortasha jalaqysy 366,2 myń teńgeni quraıdy.

Túrli-tústi metall óndirý salasyndaǵy ortasha eńbekaqy - 261,4 myń teńge, kómir óndirisinde - 242,6 myń teńge, óńdeý ónerkásibinde - 172,3 myń teńge, elektrmen, jylýmen, gazben qamtý - 148 myń teńge, sýmen qamtý jáne káriz júıesinde - 104,9 myń teńge.

Jalpy alǵanda, ónerkásip salasyndaǵy eńbekaqy bir jylda 11%-ǵa ósken.