Qazaqstan óńdelmegen bolatty syrtqa shyǵarýǵa 6 aılyq tyıym engizbekshi

ASTANA. KAZINFORM – Ónerkásip jáne qurylys mınıstrligi óńdelmegen bolatty syrtqa shyǵarýǵa alty aı boıy tyıym salatyn qujatty ashyq talqylaýǵa shyǵardy.

- Qazaqstan Respýblıkasynyń aýmaǵynan kóliktiń barlyq túrimen:

- legırlenbegen bolat quımasy men bastapqy formadaǵy temirdi (7203 taýar pozıtsııasyndaǵy temirden basqa);

- temirden nemese legırlenbegen bolattan jasalǵan jartylaı fabrıkattardy áketýge alty aı merzimge tyıym salýdy engizilsin, - dep jazylǵan qujat jobasynda.

Qujatta bul sheshim eldegi metallýrgııa kásiporyndaryn qosylǵan quny joǵary, ortasha jáne tereń óńdelgen daıyn ónim óndirisin damytyp, bolat quıý ónerkásibin keńeıtýge yntalandyrý úshin qabyldanǵany aıtylǵan.

Qujat jobasy 16 maýsymǵa deıin qoǵam talqylaýynda bolady.

Buǵan deıin osy vedomstvodaǵy Ónerkásip komıtetiniń tóraǵasy Azamat Panbaev Qazaqstan nege metaldy shıkideı satýdan bas tartpaı otyrǵanyn túsindirgen bolatyn.