Qazaqstan «ómirlik mańyzy bar dárilerdiń» 37 paıyzyn ózi óndirip otyr — Úkimet otyrysy

ASTANA. KAZINFORM — Aýyldarda jańadan ashylatyn medıtsınalyq mekemelerdiń bárinde dárihana buryshy bolady. Bul týraly Úkimet otyrysynda Densaýlyq saqtaý mınıstriniń orynbasary Tımýr Muratov aıtty. 

— Elimizde 10 myńnan astam dárihana uıymdary jumys isteıdi. Onyń ishinde 2 700-i aýyldarda ornalasqan. Shalǵaı eldi mekenderde 11 jyljymaly dárihana beketi jumys isteıdi.

Aýyl turǵyndary dárihanaǵa qol jetkizý úshin kelesi jyly jańadan ashylyp jatqan aýyldyq medıtsınalyq uıymdar bazasynda dárihana beketterin ashý josparlanyp otyr, — dedi Tımýr Muratov.

Sondaı-aq, ol eldegi 2 174 dárihana tıisti dárihanalyq tájirıbe (GDP) standarttaryna sáıkes ekenin atap ótti.

— Elimizde jalpy 20 476 dárilik zat pen medıtsınalyq buıym tirkelgen. Olardyń 15%-dan astamy — qazaqstandyq óndirýshiler. Al, Dúnıejúzilik densaýlyq saqtaý uıymy usynǵan «ómirlik mańyzy bar dáriler» tiziminde elimizde otandyq ónimder úlesi 37% boldy, — dedi vıtse-mınıstr.

Aıta keteıik, búgin Úkimet halyqty dári-dármekpen qamtamasyz etý jaıyn talqylap jatyr.