Qazaqstan Oman arqyly jańa naryqtarǵa jol ashpaq
ASTANA. KAZINFORM — Qasym-Jomart Toqaev ekonomıkanyń negizgi salalarynda birlesken jobalardy júzege asyrý tájirıbesine egjeı-tegjeıli toqtaldy.
— Energetıka jáne taý-ken ónerkásibindegi kópjyldyq tabysty seriktestigimiz oń nátıjesin bere bastady. Biz muny maqtan tutamyz. Ómirlik mańyzy bar osy salalarda áleýetimizdi biriktirý eki eldiń ıgiligine qyzmet etetin birlesken jańa kásiporyndardyń paıda bolýyna septigin tıgizedi, — dedi Memleket basshysy.
Prezıdent kólik-logıstıka salasynda yntymaqtastyq áleýeti zor ekenin aıtty.
— Biz Omandy kólik-logıstıka salasyndaǵy mańyzdy seriktes retinde qarastyramyz. Óıtkeni, bul — strategııalyq turǵydan utymdy ornalasqan, port ınfraqurylymy ilgeri, Taıaý Shyǵys pen Afrıka naryqtaryna shyǵatyn joly bar el. Al Qazaqstan — tabıǵı resýrsy mol, óndiris bazasy damyǵan, Azııa men Eýropa arasyndaǵy kólik baǵdarlarynda strategııalyq ról atqaratyn ári kólik baılanysyn órkendetý jóninde naqty josparǵa ıe memleket, — dedi Qasym-Jomart Toqaev.
Budan bólek, Memleket basshysy aýyl sharýashylyǵy men azyq-túlik qaýipsizdigi salalaryndaǵy yntymaqtastyqty nyǵaıtýǵa úndedi.
— Elimizdiń jazıraly dalasynda aýyl sharýashylyǵymen aınalysýǵa mol múmkindik bar. Sondyqtan búkil Shyǵanaq aımaǵynyń azyq-túlik qaýipsizdigin qamtamasyz etýde senimdi seriktes bola alamyz, — dedi Prezıdent.
Qasym-Jomart Toqaev sóz sońynda qazirgi ýaqytta saıası deńgeıde qol jetkizilgen ýaǵdalastyqtardy naqty iske ulastyrý jáne ekonomıkalyq baılanystardy qazaq-oman seriktestiginiń tiregine aınaldyrý basty mindet ekenin aıtty.
— Qazaqstan men Oman kásipkerlerin seriktestik baılanys ornatý, keleshegi zor jobalardy pysyqtaý jáne ınvestıtsııa aýqymyn keńeıtý maqsatynda Іskerlik keńes múmkindikterin keńinen paıdalanýǵa shaqyramyn. Іsker toptar belsendi úles qossa, ekonomıkalyq áriptestigimiz jańa deńgeıge kóteriletini anyq, — dedi Memleket basshysy.
Sondaı-aq forýmda AHQO basqarýshysy Renat Bekturov, «Samuryq-Qazyna» AQ basqarma tóraǵasy Nurlan Jaqypov jáne Oman Investment Authority prezıdenti Abdýlsalam ben Muhammed Ál-Mýrshıdı sóz sóıledi.
