Qazaqstan ólketanýshylarynyń odaǵy quryldy
«Barlyq ólketanýshylar men mýzeı qyzmetkerleriniń basyn qosyp, olardy «Kıeli Qazaqstan» kartasyn jasaýǵa jumyldyrý maqsatynda elimizde alǵash ret «Qazaqstannyń ólketanýshylar odaǵy» quryldy», - dedi mınıstr jumada ótken ulttyq qoǵamdyq sanany jańǵyrtý komıssııasynyń otyrysynda.
Ol týrıstik mashrýttardy damytýǵa den qoıa otyryp, kıeli beldeý qalyptastyrý boıynsha barlyq salalardy sáıkestendirýmen «Qazaqstannyń kıeli geografııasy» tujyrymdamasynyń jobasy ázirlengenin habarlady. Jobanyń negizgi oryndaýshysy - Ulttyq mýzeı. Onyń bazasynda «Kıeli Qazaqstan» ǵylymı-zertteý ortalyǵy quryldy. Ortalyq tikeleı «Qazaqstannyń kıeli oryndarynyń atlasyn» ádistemelik súıemeldeýmen aınalysady. Osy kezeńde Ortalyq kıeli oryndar men eskertkishter boıynsha ózekti aqparat qalyptastyrdy.
«Qazaqstannyń kıeli geografııasy» arnaıy jobasyn iske asyrý jumystary birneshe baǵyt boıynsha qarastyrylýda. «Ulttyq qundylyqtar - el birligi» ǵylymı jáne mádenı baǵdarlamasy, onyń aıasynda tarıhı sanany nyǵaıtý maqsatynda ulttyq qundylyqtar men kıeli oryndardy zerdeleý, nasıhattaý sharalary qabyldanady. «Rýhanı kerýen» týrızm jáne qajylyq baǵdarlamasy aıasynda Qazaqstan halqynyń rýhanı murasyna súıenetin ishki mádenı jáne qajylyq týrızmdi damytý, qoldaý sharalary qabyldanady.
«Asyl urpaq» mádenı-bilim berý baǵdarlamasynyń aıasynda eldiń kıeli oryndarynyń mádenı-geografııalyq beldeýiniń róli men oryndary jaıly ár qazaqstandyq úshin qosymsha bilim berýdi uıymdastyrý máseleleri qarastyrylsa, «Kıeli Qazaqstan» aıasynda Qazaqstannyń kıeli geografııasyn aqparattyq súıemeldeý, nasıhattaý sharalary qabyldanady.
