Qazaqstan Olımpıada oıyndaryn jalpy esepte 43-orynmen aıaqtady

PARIJ. KAZINFORM — Búgin Frantsııa astasy Parıj qalasynda ótip jatqan Olımpıada oıyndary máresine jetti. Nátıjesinde Qazaqstan quramasy jalpy esepte 43-ornnan kórindi.

Naqtyraq aıtsaq, Parıj Olımpıadasynda Qazaqstan quramasy 1 altyn, 3 kúmis, 3 qola medalǵa qol jetkizdi.

Osylaısha, tórtkil dúnıe tórt jyldyq dodany Qazaqstan quramasy jeti medalmen aıaqtady.

Altyn júldeni Olımpıadanyń alǵashqy kúni el qorjynyna dzıýdodan 60 keli salmaqta Eldos Smetov syılaǵan bolatyn.

Al kúmis júldeni sporttyq gımnastıkadan Narıman Qurbanov, grek-rım kúresinen 77 keli salmaqta Demeý Jadyaev jáne bokstan 80 keli salmaqta el namysyn qorǵaǵan Nurbek Oraldaı jeńip aldy.

Qola medaldardy nysana kózdeýden komandalyq jarysta Islam Satpaev pen Aleksandra Le (tapanshamen 10 metrden atý), dzıýdodan 66 keli salmaqta Ǵusman Qyrǵyzbaev jáne áıelder boksynan 51 keli salmaqta el namysyn qorǵaǵan Nazym Qyzaıbaı jeńip aldy.

Esterińizge sala ketsek, Tokıo Olımpıadasynda Qazaqstan quramasy 8 qola medalmen shektelgen bolatyn.

Al 2016 jyly Rıo Olımpıadasynda 26 sport túrinen 104 sportshy qatysyp, qazaqstandyqtar barlyǵy 17 medal (3 altyn, 5 kúmis, 9 qola) jeńip aldy. Bul el sporty tarıhynda kúmis jáne jalpy júldeler sany jóninen rekordtyq kórsetkishke qol jetkizdi.

Ókinishke qaraı, Parıjde sportshylarymyz jalpy jeti medalǵa qol jetkizdi.