Qazaqstan ólim jazasyna zań júzinde tyıym salynǵan elder tobyna qosylady
NUR-SULTAN. QazAqparat –Búgin Senattyń jalpy otyrysynda «Qazaqstan Respýblıkasynyń keıbir zańnamalyq aktilerine ólim jazasyn joıý máselesi boıynsha ózgerister men tolyqtyrý engizý týraly» QR Zańyn qabyldady, dep habarlaıdy QazAqparat tilshisi.
«Elimiz Táýelsizdik alǵannan beri ólim jazasyn qoldaný aıasyn kezeń-kezeńimen qysqartyp kele jatqanyn bilesizder. Memleket basshysy Ulttyq qoǵamdyq senim keńesiniń bıylǵy qarashada ótken otyrysynda Qazaqstanda ólim jazasy qandaıda bir eskertpesiz joıylýǵa tıis degen ustanymdy bildirdi. Osy zańdy qabyldaı otyryp, Qazaqstan ólim jazasyna zań júzinde tyıym salynǵan elder tobyna qosylady», - dep atap ótti Senat spıkeri Máýlen Áshimbaev.
Sondaı-aq ol elimiz ólim jazasyn tolyǵymen joıýǵa baǵyttalǵan halyqaralyq qozǵalysty qoldaıtyndyǵyn is júzinde dáleldep otyrǵandyǵyn basa aıtty.
«Qabyldanǵan zań elimizdiń demokratııalyq jolmen damýyna óz úlesin qosady dep senemiz», - dedi Senat Tóraǵasy.
