Qazaqstan oqýshylary qıyn úı tapsyrmasyn radıonyń tikeleı efırinde oryndaı alady
ASTANA. QazAqparat - «Qazaqstan» teleradıokorporatsııasynyń 2017-2018 jylǵy jańa maýsymynda «Respýblıkalyq radıo» JShS-niń bas dırektory Mádı Manatbek ózi jetekshilik etetin mekemeniń ataýy budan bylaı «QAZAQ RADIOLARY» dep atalatynyn málim etti, dep habarlaıdy «QazAqparat» HAA tilshisi.
96 jyldyq tarıhy bar «Respýblıkalyq radıonyń» quramyna «Qazaq radiosy», «Shalqar», «Astana», «Klassik» radıolary biriktirilgeni belgili. «Qazaq radiosy» tyńdarmandar úshin jańa maýsymdy «Kezeń», «Alań», «Alashnama», «Álem ádebıeti», «Qaýyrsyn qalam», «Ara», «Jyr kerýen», «Aıtys», «Aldaspan», «Sarbaz», «Aq otaý», «Jan jylýy», «Úı tapsyrmasy», «Súıinshi» baǵdarlamalarymen ashatyn bolady. Almas Almatov, Kópen Ámirbek, Amangeldi Keńshilikuly, Amangeldi Qurmet, Qalqaman Sarın, Nazıra Berdaly, Qydyrbek Rysbekuly, Aqbaıan Saparbaı syndy belgili efır júrgizýshileri radıodan habar taratyp, baǵdarlamalardy júrgizedi.
«Jańa televızııalyq maýsymda telearnalardan qalyspaı, óziniń tarıhynda alǵash ret bizdiń radıo ujymy korporatsııanyń quramdas bóligi retinde bastaǵaly otyr. Ózderińiz kórip otyrǵandaı, bizdiń logomyz ben ataýymyz ózgertildi. Onyń sebebi bar. Óıtkeni, bizdiń ataýymyz «Respýblıkalyq radıo» JShS bolatyn. Biraq, habarlasqan jurtshylyq «Respýblıkalyq radıo» degen jańa radıo ma dep kóp saýal qoıatyn. Keıin tóraǵamyzben, basshylyǵymyzben aqyldasa kele 96 jyldyq tarıhy bar «Qazaq radıosynyń» brendin negizge alyp, osy tórt radıonyń basyn qosqan mekemeni «QAZAQ RADIOLARY» dep ataýdy jón sanadyq. Onyń quramyna «Qazaq radiosy», «Shalqar», «Astana», «Klassik» radıolary kiredi», - deıdi Mádı Manatbek.
28 tamyzdan bastap «QAZAQ RADIOLARY» atanatyn mekeme basshysynyń aıtýynsha, 4 radıony jańa maýsymda negizinen áleýmettik, qoǵamdyq jáne saıası baǵytta damytý josparlanyp otyr. Onyń syry da joq emes.
«Mysaly, «Aq otaý» degen baǵdarlamany ashqan sebebimiz, elimizde jyl saıyn otaý quratyn 100 otbasynyń 36-40 juby ajyrasyp ketip jatady. Bul degenińiz, qaımaǵy buzylmaǵan qazaq otbasyna kesir kirdi degen sóz. Otbasyn saqtaý maqsatynda baǵdarlamany ashtyq. Odan keıin «Jan jylýy» atty baǵdarlama arqyly qaltaly azamattarǵa qaıyrymdylyq jasaýdy úndemekpiz. Mysaly úshin radıobaǵdarlama arqyly 4 jarym jastaǵy Anel degen qyzdyń emine 14 mıllıon teńge taýyp berdik. Qyzylordadaǵy kópbalaly otbasyǵa 3 bólmeli páterdiń berilýine sebepker boldyq. Sol sekildi mysaldar kóp. Úshinshiden, «Úı tapsyrmasy» degen baǵdarlama qosyldy. Óıtkeni, jyl saıyn mektep oqýshylaryna beriletin tapsyrmalar ózgeredi. Sómkesi de, tapsyrmasy da aýyr. Sondyqtan, balalarǵa ońaı bolsyn deımiz. Balalar tikeleı efırde habarlasyp, aptasyna bes ret, saǵat 15:00-16:00 aralyǵynda suraq qoıyp, pánder boıynsha suraqtarǵa jaýap ala alady», - deıdi ol.
Eń qyzyǵy, joǵaryda atalǵandardyń úsheýi de televızııalyq baǵdarlama bolǵan. Biraq, mekeme basshylyǵy tájirıbe jasap, olardy radıoǵa engizgen eken. Sondaı-aq, qoǵamdyq saıası jaǵynan Prezıdenttiń «Rýhanı jańǵyrý» maqalasyna oraı «Kezeń» degen baǵdarlama ashylyp otyr. Ol dúısenbi, sársenbi, beısenbi kúnderi júredi. «Alań» atty saıası tok-shoýdy qolǵa alǵan efır júrgizýshisi Amangeldi Qurmetuly elimizde bolyp jatqan ahýaldarǵa tereń boılamaq. Buǵan qosa jańa maýsymnan bastap «Alashnama» baǵdarlamasy qazaq ultynyń qalyptasý tarıhynan syr shertedi.
«Búkil radıolarymyzdyń barlyǵyn ınternet jelisine, áleýmettik jelilerge, WhatsApp-qa qostyq. Sol nómirge halyq quttyqtaýlaryn jáne taǵy basqa habarlamalaryn jibere alady», - dep túıdi Mádı Manatbek.
Eske sala ketsek, 23 tamyzda Astana qalasynda «Qazaqstan» teleradıokorporatsııasynyń 2017-2018 jylǵy jańa telemaýsymynyń tusaýkeseri men jańartylǵan brendiniń tanystyrylymy ótken bolatyn. Saltanatty sharaǵa QR Aqparat jáne kommýnıkatsııalar mınıstri Dáýren Abaev, qoǵam qaıratkerleri, respýblıkalyq, aımaqtyq aqparat quraldarynyń basshylary kelip, teleradıokorporatsııaǵa qarasty medıaaktıvterdiń 28 tamyzda bastaıtyn tyń jumysymen tanysty.
