Qazaqstan oqýshylary Eýropa olımpıadasynyń júldegerleri atandy
NUR-SULTAN. QazAqparat – Qazaqstan oqýshylarynyń olımpıada quramasy geografııa páninen ótken Eýropa olımpıadasynda kúmis jáne qola medal jeńip aldy. Bilim saıysy 18-21 maýsym aralyǵynda Serbııada onlaın formatta ótken, dep habarlaıdy QazAqparat.
Zııatkerlik baıqaýǵa 13 elden 152 oqýshy qatysqan. Aqtóbe men Shymkentte respýblıkalyq olımpıadada top jarǵan úsh oqýshy Qazaqstan atynan baıqaýǵa qatysty. Olardy halyqaralyq saıysqa geografııa ǵylymynyń doktory, Ál-Farabı atyndaǵy QazUÝ professory G.Núsipova daıyndaǵan.
Jazbasha, mýltımedııa testiler men praktıkalyq týrdyń qorytyndysy boıynsha Qazaqstan quramasynyń qorjynyna eki medal tústi. Rýstam Valeev «kúmis» alsa, Erkebulan Tazabek «qolaǵa» qol jetkizdi. Al quramanyń taǵy bir múshesi Beıhan Muqanovqa baıqaý sertıfıkaty berildi.
«Bul olımpıada oqýshylardyń geografııalyq jáne ekologııalyq zertteýlerge qyzyǵýshylyǵyn arttyrady. Zııatkerlik jarys jas geograftar úshin bıylǵy birinshi iri synaq ári tamyz aıynda ótetin halyqaralyq olımpıadaǵa qatysatyn baspaldaq boldy. Jýyqta ǵana shákirtterimiz ınformatıka páninen ótken olımpıadada tórt qola medal jeńip aldy», - deıdi Mektepke deıingi jáne orta bilim komıtetiniń tóraıymy Maıra Meldebekova.
Aıta keteıik, bul zııatkerlik saıysqa Qazaqstan oqýshylary osymen úshinshi jyl qatysyp otyr. Byltyr da oqýshylarymyz bir kúmis jáne bir qola jeńip alǵan bolatyn.
