Qazaqstan oqýshylary «Jas jol ınspektorlary» halyqaralyq baıqaýynda júldeger atandy
ASTANA. KAZINFORM – «Jas jol ınspektorlary» halyqaralyq baıqaýy Tájikstanda ótti, - dep jazdy Polisia.kz.
Baıqaýǵa Táýelsiz Memleketter Dostastyǵyna (TMD) múshe Tájikstan, Ózbekstan, Qyrǵyzstan, Qazaqstan, Reseı Federatsııasy, Ázirbaıjan jáne Belarýs elderiniń komandalary qatysty.
Baıqaýdyń maqsaty – jasóspirimderdi quqyqtyq turǵydan tárbıeleý jáne olarǵa jol júrisi qaǵıdalaryn úıretý. Saıys 15–20 shilde aralyǵynda Tájikstannyń Soǵdy oblysyndaǵy Gýlıston qalasynda TMD elderiniń jas jol ınspektorlarynyń ІІІ Memleketaralyq sleti aıasynda ótti.
Baıqaý qorytyndysy boıynsha birinshi oryndy Belarýs komandasy ıelense, ekinshi oryndy Qazaqstan oqýshylary jeńip aldy.
Halyqaralyq arenada elimizdiń namysyn Aqtaý qalasyndaǵy №8 jalpy bilim beretin mekteptiń jas jol ınspektorlary qorǵady. Qazaqstandyq komanda joǵary daıyndyq deńgeıin, tereń bilimin jáne myqty komandalyq rýhyn kórsetti.
Aıta keteıik, qazaqstandyq oqýshylar álemdegi eń bedeldi olımpıadada 6 medal jeńip aldy.