Qazaqstan oqýshylary Eýropa olımpıadasynda jeti medal jeńip aldy
ASTANA. KAZINFORM – Lıtvada ótken Geografııa páni boıynsha Eýropa olımpıadasynda (EGeo) Qazaqstan quramasy joǵary nátıje kórsetip, jeti medal ıelendi.
QR Oqý-aǵartý mınıstrligi málimetinshe, altyn medaldi elimizdiń qorjynyna Taldyqorǵan qalasyndaǵy №24 mamandandyrylǵan lıtseıdiń 9-synyp oqýshysy Daryn Bekbol saldy. Ol kishi (jasóspirimder) sanatynda (12-15 jas) eń úzdik atandy.
Qola júldeni Shymkent qalasyndaǵy NZM-niń 9-synyp oqýshysy Mıkael Pochýkaev jeńip aldy.
Negizgi (úlken) jas sanatynda (16–19 jas) Qazaqstan quramasynyń qorjynyna medal salǵandar:
— Qostanaı qalasyndaǵy NZM 10-synyp oqýshysy Andreı Enbahtov;
— Taldyqorǵan qalasyndaǵy NZM 12-synyp oqýshysy Aqjol Bolat;
— Aqtóbe qalasyndaǵy NZM 12-synyp oqýshysy Alıhan Kalmagambetov;
— Pavlodar qalasyndaǵy NZM 11-synyp oqýshysy Mansýr Tursynǵalıev;
— Taldyqorǵan qalasyndaǵy NZM 10-synyp oqýshysy Ramıl Imashev.
Komandanyń jetekshileri men jattyqtyrýshylary — respýblıkalyq jáne halyqaralyq olımpıadalardyń birneshe dúrkin júldegerleri Abaı Dúısen men Aqberen Aıjaryq.
Aıta keteıik, EGeo olımpıadasy 2015 jyldan beri ótkizilip keledi. Basty maqsat — geografııa jáne ekologııa salasyna qyzyǵýshylyqty arttyrý.
Baıqaý úsh kezeńnen turady: jazbasha test, mýltımedııalyq tapsyrma jáne dala týry. Barlyq tapsyrma aǵylshyn tilinde oryndalady. 2024 jyly Qazaqstan quramasy alty medal enshilegen bolatyn.
Qazaqstandyq oqýshylar Balqan matematıkalyq olımpıadasynda eń úzdik atanǵanyn jazǵan edik.
