Qazaqstan oqýshylary Balqan óńiri úzdik matematıkteriniń úshtigine kirdi

ASTANA.KAZINFORM  - Saraevo qalasynda (Bosnııa jáne Gertsegovına) 22 eldiń oqýshylary qatysqan Balqan halyqaralyq matematıkalyq olımpıadasy (BMO) aıaqtaldy.

QR Oqý-aǵartý mınıstrligi málimetinshe, Qazaqstan oqýshylary el qorjynyna úsh kúmis jáne úsh qola medal salyp, 100% kórsetkish kórsetti.

Qazaqstan quramasy jalpy alty júlde ıelendi:

Kúmis júlde ıegerleri:

• Amır Sahıpov — Almaty qalasyndaǵy RFMM-niń 11-synyp oqýshysy;

• Marǵulan Sharel — Astana qalasyndaǵy Spectrum mektebiniń 11-synyp oqýshysy;

• Eldar Úsenov — Almaty qalasyndaǵy Nazarbaev zııatkerlik mektebiniń 10-synyp oqýshysy.

Qola medal ıegerleri:

• Damır Nurlanov — Aqtaý qalasyndaǵy Nazarbaev zııatkerlik mektebiniń 12-synyp oqýshysy;

• Ámirlan Amanjolov — Almaty qalasyndaǵy Haileybury mektebiniń 11-synyp oqýshysy;

• Berdibek Orynbasar — Atyraý oblysyndaǵy №1 «Bilim-ınnovatsııa» lıtseıiniń 10-synyp oqýshysy.

– BMO olımpıadasyna qatysý – Qazaqstan quramasynyń shilde aıynda Aýstralııanyń Kvınslend qalasynda ótetin halyqaralyq matematıkalyq olımpıadaǵa (IMO) daıyndyǵyndaǵy mańyzdy kezeń. Memleketke jas talanttardy qoldaǵany úshin, sondaı-aq ustazdaryma jáne barlyq jattyqtyrýshy komandaǵa kásibı daıyndyq úshin shyn júrekten alǵys aıtamyn, – dedi olımpıadanyń kúmis júldegeri Marǵulan Sharel.

Ulttyq quramanyń jattyqtyrýshylary – Asylbek Isahov pen Muhtar Qabaq.

Esterińizge sala keteıik, bul – qazaqstandyq oqýshylardyń ekinshi rekordtyq nátıjesi. 2024 jyly da olar úzdik úshtikten kóringen bolatyn.

Buǵan deıin jazǵanymyzdaı, Qazaqstan oqýshylary álemdegi eń iri robototehnıka chempıonatynda el namysyn qorǵaıdy.