Qazaqstan oqýshylary álemdegi eń bedeldi olımpıadada tórt medal jeńip aldy

ASTANA. KAZINFORM - Fılıppınde mektep oqýshylaryna arnalǵan álemdegi basty zııatkerlik saıystardyń biri – Halyqaralyq bıologııa olımpıadasy (International Biology Olympiad, IBO-2025) óz máresine jetti.

Oqý-aǵartý mınıstrligi málimetinshe, bıyl bul dodaǵa 80 elden 320-dan astam daryndy jas qatysty.

Qazaqstan quramasynyń barlyq tórt múshesi qola medal ıelenip, 100 paıyzdyq komandalyq nátıje kórsetti:

Ersýltan Qaıyrken – Pavlodar oblysyndaǵy «Bilim-ınnovatsııa» lıtseı-ınternatynyń 10-synyp oqýshysy;

Batyr Erjanuly – Óskemen qalasyndaǵy Nazarbaev Zııatkerlik mektebiniń 11-synyp oqýshysy;

Aıǵanym Baltasheva – Astana qalasyndaǵy Nazarbaev Zııatkerlik mektebiniń 12-synyp oqýshysy;

Alıhan Ashyrhanov – Almaty qalasyndaǵy «Bilim-ınnovatsııa» lıtseı-ınternatynyń 8-synyp oqýshysy.

Komandanyń ǵylymı jetekshileri – otandyq ǵylymdy belsendi damytyp júrgen jas bıolog-ǵalymdar Láılá Asqarova men Ilıas Sakımov.

IBO-2025 olımpıadasy eki kezeńnen turdy: Teorııalyq týr – molekýlalyq jáne jasýshalyq bıologııa, genetıka, ekologııa, evolıýtsııa jáne bıojúıeleý boıynsha kúrdeli esepterdi sheshý. Praktıkalyq týr – zerthanalyq jumystar, mıkroskopııa, úlgilermen jumys isteý jáne bıologııalyq protsesterdi taldaý.

Qazaqstan 1994 jyldan beri IBO olımpıadasyna qatysyp keledi. Osy ýaqyt ishinde ulttyq qurama 2 altyn, 18 kúmis jáne 56 qola medal, sondaı-aq 12 qurmet gramotasyn jeńip aldy.

Eske sala keteıik, 2024 jyly Qazaqstan bul olımpıadany ózi qabyldap, taǵy da 100 paıyzdyq nátıjege qol jetkizgen bolatyn.

Qazaqstan quramasy álemdik deńgeıdegi zııatkerlik saıystarda joǵary nátıjeler kórsetýdi jalǵastyryp keledi. Aýstralııada ótken mektep oqýshylaryna arnalǵan eń bedeldi pándik olımpıadalardyń biri — Matematıkadan halyqaralyq olımpıadada qazaqstandyq oqýshylar alty medal jeńip aldy.