Qazaqstan ókili Halyqaralyq dzıýdo federatsııasy Áskerı komıssııasynyń basshysy boldy
ASTANA. KAZINFORM – Arman Ábeýov Halyqaralyq dzıýdo federatsııasynyń (IJF) Áskerı jáne polıtsııa komıssııasy quramyndaǵy Áskerı komıssııanyń basshysy bolyp taǵaıyndaldy.
Bul týraly federatsııanyń resmı qurylymdary habarlady.
Mamandardyń aıtýynsha, taǵaıyndaý Arman Ábeýovtiń kásibı tájirıbesi men sportty, áskerı-patrıottyq tárbıeni jáne dzıýdo salasyndaǵy halyqaralyq yntymaqtastyqty damytýǵa qosqan úlesiniń joǵary baǵalanǵanyn kórsetedi.
Halyqaralyq dzıýdo federatsııasy janyndaǵy Áskerı komıssııa túrli elderdiń qarýly kúshteri men quqyq qorǵaý organdarynda dzıýdony damytý jáne nasıhattaý jumystarymen aınalysady.
Komıssııa qyzmetiniń negizgi baǵyttary qatarynda tártipti nyǵaıtý, kóshbasshylyq qasıetterdi qalyptastyrý, dene daıyndyǵyn jetildirý jáne qoǵamǵa qyzmet etý qundylyqtaryn dáripteý bar.
Qazirgi ýaqytta Arman Ábeýov Qazaqstan Respýblıkasy Qorǵanys mınıstrliginiń Sport komıteti tóraǵasy – Armııa ortalyq sport klýbynyń bastyǵy qyzmetin atqarady.
Onyń jetekshiligimen Qarýly kúshterde dene shynyqtyrý men sportty damytý, áskerı qyzmetshi-sportshylardy halyqaralyq jarystarǵa daıarlaý jáne áskerı-qoldanbaly sport túrlerin jetildirý baǵytynda jumystar júrgizilip keledi.
– Arman Ábeýov dzıýdonyń álemdegi áskerı jáne memlekettik qurylymdarǵa bere alatyn qundylyqtaryn aıqyn kórsetedi. Onyń tájirıbesi, kóshbasshylyq qasıetteri jáne dzıýdoǵa degen ómirlik adaldyǵy bizdiń áskerı jáne polıtsııa komıssııasynyń qyzmetin odan ári damytýǵa mańyzdy úles qosady, – dedi Halyqaralyq dzıýdo federatsııasynyń prezıdenti, rýmynııalyq sport fýnktsıoneri Marıýs Vızer.
Arman Ábeýov – dzıýdodan halyqaralyq dárejedegi sport sheberi, Qazaqstan chempıony jáne halyqaralyq týrnırlerdiń jeńimpazy.
Sondaı-aq ol Abý-Dabı men Las-Vegas qalalarynda ótken ardagerler arasyndaǵy álem chempıonattarynyń júldegeri atanǵan.
Mamandar bul taǵaıyndaýdy Qazaqstannyń dzıýdo men áskerı sport salasyndaǵy jetistikteriniń halyqaralyq deńgeıde moıyndalýy retinde baǵalap otyr.
Aıta keteıik, Narıman Dúısekeev QTJ baspasóz qyzmetine taǵaıyndaldy.
