Qazaqstan ókili BUU-nyń resýrstardy basqarý bıýrosyna vıtse-tóraǵa boldy
ASTANA. KAZINFORM — 2026 jylǵy 28 sáýirde Jeneva qalasynda ótken «Resýrstardy basqarý aptalyǵy» aıasynda «Ulttyq geologııalyq qyzmet» AQ basqarma tóraǵasynyń orynbasary Farhat Abytov BUU Eýropalyq ekonomıkalyq komıssııasynyń Resýrstardy basqarý jónindegi bıýrosynyń vıtse-tóraǵasy bolyp saılandy.
Ónerkásip jáne qurylys mınıstrligi baspasóz qyzmetiniń málimetinshe, BUU EEK-tiń Resýrstardy basqarý jónindegi bıýrosy — tabıǵı resýrstardy turaqty basqarý salasyndaǵy jahandyq kún tártibi qalyptasatyn BUU-nyń mańyzdy alańy. Bıýro BUU aıasynda 56 eldiń sarapshylaryn biriktirip, energetıkalyq kóshý jaǵdaıynda jaýapty jer qoınaýyn paıdalaný jáne shıkizattyq qaýipsizdikti qamtamasyz etý boıynsha sheshimder ázirleıdi.
Aıta ketý kerek, bıýronyń vıtse-tóraǵasy qyzmeti qoǵamdyq negizde júzege asyrylady jáne saraptamalyq-konsýltatıvtik sıpatqa ıe.
— Vıtse-tóraǵa bolyp saılaný — halyqaralyq yntymaqtastyqty nyǵaıtyp, qazaqstandyq sarapshylardyń áleýetin arttyrýǵa berilgen múmkindik. Bizdiń basty mindetimiz — BUU EEK óńiri elderimen áriptestikti keńeıtý, birlesken jobalar úshin ozyq tájirıbeler men saraptamany tartý, sondaı-aq turaqty resýrstardy basqarý jónindegi jahandyq dıalogta Qazaqstannyń múddesin ilgeriletý. Álemdik shıkizatqa suranystyń artýy jaǵdaıynda týyndap otyrǵan syn-qaterlerge tek ashyq ózara is-qımyl men tájirıbe almasý arqyly ǵana jaýap bere alamyz dep senemin, — Farhat Abytov atap ótti.
«Ulttyq geologııalyq qyzmet» AQ BUU júıesindegi halyqaralyq uıymdarmen ózara is-qımyldy júıeli túrde nyǵaıtyp keledi.
Mınıstrlik atap ótkendeı, bıýronyń basshylyq quramyna saılaný geologııa jáne turaqty jer qoınaýyn paıdalaný salasynda birlesken bastamalardy iske asyrý men bilim almasýǵa jańa múmkindikter ashady.
Budan buryn Erbol Tasjúrekov aýyl sharýashylyǵy vıtse-mınıstri qyzmetinen bosatylǵanyn jazǵanbyz.
